Klima aldaketari aurre hartzeko plana osatu du udalak
Energia komunitatea osatzeko prozesua martxan da, eta dagoeneko herritar multzo bat lanean dago horretan.
Ezkerretik eskuinera, hurrenez hurren: Garbiñe Oiarbide (EAJko zinegotzia Errenterian), Niko Bengoetxea (Errenteriako Udaleko Energia teknikaria), Aizpea Otaegi (Errenteriako alkatea), Beñat Irasuegi (Energia Lantaldeko kidea), David Muñoz (Oarsoaldea Garapen Agentziako teknikaria), Juanmari Madinazkoitia (Energia lantaldeko kidea) eta Jose Manuel Ferradas (Errenteriako Ingurumen zinegotzia). Errenteriako Udalak Klimaren eta Energia Iraunkorraren aldeko ekintza plana prestatu du azken hilabeteetan. Helburua klima aldaketari aurrea hartzea da, energia iraunkorraren aldeko pausoak emanez. Aipatutako plana eragile ezberdinen ekarpenen bidez sortutakoa da, eta Errenteriako Udalak parte hartu duten eragile guztiei eskerrak eman die.
Planak hiru helburu nagusi ezarri ditu. Alde batetik, udalerriko berotegi efektuko gasen emisioak %55 gutxitu nahi ditu udalak; bestetik, udal instalazioetako kontsumoa ere murriztu nahi du, kasu horretan %35. Azkenik, udal instalazioetako energia berriztagarrien tokiko sorkuntza %32raino handitu nahi du instituzioak.
Azpimarratutako helburuak lortzeko 25 milioi euroko inbertsioa egin du Errenteriako Udalak hurrengo hamar urteetarako. Planak 148 ekintza jasotzen ditu. Hala ere, Errenteriako Udalak deia egiten nahi die herriko eragileei eta orokorrean herritarrei. Norbere eremutik ekarpenak egin eta bide horretan lagungarri izango diren ekimen kolektiboetan parte hartzeko eskatu die errenteriarrei. Izan ere, eragileen inplikazioa eta ekimena ezinbestekoa dela uste du instituzioak.
Aizpea Otaegi alkatearen esanetan energia komunitatea sortzeko prozesua ere martxan da, eta dagoeneko herritar multzo bat lanean dago horretan. Alkateak garrantzitsutzat jo du prozesua, bere aburuz herritarrei gaiaren inguruan ahalduntzeko aukera ematen zaielako, eta komunitatea sortzeko prozesu horretatik plana inplementatzeko iniziatibak sortuko direlako.
Gaur planaren aurkezpenean udal gobernuko kide batzuk, EAJko udal taldeko ordezkaritza bat, eta Energia Lantaldeko hainbat kide egon dira.
