Kurkubi, txapeldun
Ostiralean etxeko norgehiagoka irabazita, eta aurkarien partidetako emaitzak alde izanda, lortu dute txapela eskuratzea.
Kurkubi Saskibaloi Klubeko nesken Junior Taldeak bigarren faseko liga irabazi du. Asteburu honetan berretsi egin dute emaitza hori. Izan ere, ostiralean Bekoerrota kiroldegian zuten partida Easo Malkorri taldeari 50-36 irabazi, eta larunbatean jokatzekoa zen Zarauzko Zast eta Tolosako TAKEn artekoaren zain gelditu ziren. Zarauztarrek irabazi, eta beraz, lehen postua lezoarrentzat izan da.
Ez du bide erraza izan Kurkubik titulua eskuratzeko. Lau adin tarte ezberdinetako jokalariak izan dituzte taldean, beraz, hainbat partidatan tokatu zaie adinez dezente nagusi zirenen kontra aritzea. Beraz, Irlentz Quiñones taldearen entrenatzaileak nabarmendu du ahalegin handia egin dutela aurre-aurrean egoteko, eta horren ondorioa entrenamenduetan azaldutako jarrera eta maila izan dela.
Gainera, sasoiaren azken txanpa izugarria egin dute: bost partida jarraian irabazita, oso zail zena, egikaritu dute. “Saria irabaztea oso polita izan da neskentzat”, adierazi du entrenatzaileak.