Herriko ikasleek egindako proposamenak aztertuko ditu udalak
Elizalde Herri Eskolako, Elizalde Institutuko eta Haurtzaro Ikastolako ikasleek ikasturte honetan Agenda 2030en barruan landutakoaren berri eman diete Agustin Lekuona eta Ander Santesteban zinegotziei. Dekalogo bat aurkeztu dute.
Elizalde Herri Eskolako, Elizalde Institutuko eta Haurtzaro Ikastolako hainbat ikasle Agustin Lekuona Hirigintza zinegotziarekin eta Ander Santesteban Ingurumen teknikariarekin bildu dira gaur, Eskolako Agenda 2030 programaren barruan ikasturte honetan egindako lanaren berri emateko. Ikasturte bukaerako batzarra egin dute udaletxeko pleno aretoan.
Aurten lurreko ekosistemaren inguruko lanketa egin dute ikasleek, bereziki larre eta landareen zaintza eta itsutasuna aztertu dituzte. Gaiarekiko hartutako konpromisoak dekalogo batean bildu eta udalari aurkeztu dizkiote gaur. Hainbat proposamen ere egin dizkiete zinegotziei. Hauek aztertu eta urrian berriro ikasleekin elkartzeko hitza eman du Lekuonak.
Besteak beste, Ibargain, Txara eta Hipatia parkeetan egiteko hainbat ekintza proposatu dituzte hiru zentroetako ikasleek.
Ziklo guztietako ikasleek parte hartu dute Eskola Agenda 2030en. Udalak ere programarekin konpromisoa hartua duela gogoratu du, “denon ardura baita garapen iraunkorra”.
Honakoa da ikasleek aurkeztutako dekalogoa:
- Arriskuan dauden landareak eta inbaditzaileak zeintzuk diren ohartarazi.
- Inguruko landareak gehiago ezagutu eta babestu.
- Udalak bultzatutako jardueretan parte hartu.
- Zuhaitzak identifikatu eta izendatzen ikasteko ekintzetan parte hartu.
- Inguruko balio naturalak gehiago ezagutu eta errespetatu.
- Zelai eta larreetako zaborra jaso.
- Inguruaren erabilera arduratsua egin.
- Eremu berdeetan errespetuz jokatu.
- Ingurukoekin gaia landu eta sentsibilizazioa bultzatu.
- Lore eta landareak ez suntsitzea jolastu edo biltzeko.
