Hibaikari Birziklatu programako zortzi bizikleta emango zaizkio
Birziklatu proiektuko bizikletak jasotzeaz gain, Hibaikako arraunlariek bizikleten mantenuari eta konponketari buruzko ikastaro bat egin dute.
Hibaikako kideek bizikleten ikastaroa jaso zuten. Birziklatu proiektua Gurpil Artea elkarteak sustatzen du Gipuzkoako Foru Aldundiko Mugikortasuneko eta Lurralde Antolaketako Departamentuarekin eta Ingurumeneko eta Obra Hidraulikoetako Departamentuaren lankidetzarekin. Proiektu horren helburua da erabiltzen ez diren edo kalean utzi diren bizikletak berreskuratu eta konpontzea, bigarren bizitza bat emateko. Egitasmo horren baitan, Errenteria-Oreretako Hibaika Arraun Elkarteari zortzi bizikleta eman zaizkio.
Hibaikari egindako dohaintzarekin, klubeko arraunlariek bizikletak erabili ahal izango dituzte euren eguneroko joan-etorriak errazago egiteko eta entrenamenduetan ontziaren aldamenean joateko.
Bizikletak emateaz gain, Gurpil Arteako kideak Hibaikaren egoitzan izan dira, eta ikastaro bat eman diete klubeko kideei bizikletak konpontzen ikasteko eta txirringen mantenuari buruzko gutxieneko ezagutzak eta autonomia izateko.
Hibaikari helarazi dizkioten bizikleta horiek Errenteriako eta Lezoko Udalek proiektua kudeatzen duen Gurpil Artea elkarteari egindako dohaintzaren parte dira.
