Borrokaldiarekin aurrera doaz Lezoko kirol guneetako langileak
Altzate eta Bekoerrota kirol guneetako langileak berriz ere kalera atera dira gaur. Euren egoera konpontzen den arte mobilizazioekin jarraituko dute.
Gaur ere kalera atera dira Lezoko Altzate igerilekuko eta Bekoerrota kiroldegiko langileak. Euren zereginerako baldintza duinak eskatzen ari dira mobilizazioen bitartez, bai 2012tik izoztuta dauzkaten soldatak eguneratzeko, langileen arteko ordainsari arrakalarekin bukatzeko, eta kirol instalazioen hobekuntzari ekiteko. 11:00etan manifestazioa egin dute Altzatetik abiatuta, eta behin Gurutze Santuaren plazara iritsita elkarretaratzea egin, eta haien aldarrikapenekin bat egin dutenen sinadurak aurkeztu dituzte udalean.
Hilaren 5 eta 7an greba egin zuten langileek, LABen ekimenez. Gaurko mobilizazioaz gain, larunbaterako ere martxa iragarri dute: 12:00etan manifestazioa egingo dute udaletxetik abiatuta. Egoera konpondu ezean, hilaren 27rako ere geldialdi deialdia egingo dute 09:00etatik 11:00etara.
Lan gatazkaz HITZAk jaso dituen azken datuen arabera, Lezoko Udalak aintzat hartu ditu langileen eskaerak. Baina egoera konpontzeko bidean ez da aurrera urratsik egin azken egunetan, batez ere BPXport enpresak jarri dituen eragozpenengatik. Behin betiko soluziorik ez den bitartean, LAB sindikatuak iragarri du langileek borrokaldiarekin segiko dutela.
