Asteburu zuri-gorria Antxon
Pasaia Kirol Elkarteak partida, omenaldia eta herri bazkaria antolatu ditu. Antxo AF-k, berriz, afaria, bingo solidarioa eta musika.
Zuri-gorriz jantziko da Antxo datorren larunbatean, eta ez, ordea, San Ferminetarako prestatzen hasteko, futbolagatik baizik. Zehatzago esanda, hamaikako eta areto futbolagatik.
Pasaia Kirol Elkarteak berriro ere, oraingoan bizilagunak ere gonbidatuz, omenduko du Jokin ‘Koki’ Eskisabel. 11:00etan Beteranoek partida jokatuko dute Don Boscon, eta 14:30ean herri bazkaria egingo dute Ibaiondo frontoian. Bazkarirako tiketak Axular tabernan daude salgai.
Areto futbolekoek, aldiz, Antxo AF Jaia antolatu dute. Gauean hasiko dira hauen ospakizunak, egunean zehar jokatuko baitituzte partidak klubeko bi taldeek. Afarian hasiko dira sasoia ospatzen: 22:00etan Ibaiondon dute hauek ere hitzordua. Jarraian, bingo solidarioa eta Dj Esam-en saioa.
