Bi urteren ondoren, bueltan da 'Ateak zabalduz' programa
Honakoa izango da VIII. edizioa, eta maiatzaren 24tik 26ra, erretiratuen elkarteek urtean zehar egiten dutena ezagutaraziko dute.
Aizpea Otaegi, Eñaut Gracia eta erretiratuen elkarteetako kideak. Pandemiak eragindako bi urtetako etenaldiaren ondoren, bueltan da ‘Ateak zabalduz’ programa. Honakoa izango da Errenteria-Oreretako erretiratuen udal elkarteek eta Errenteriako Udalak elkarlanean antolatzen duten VIII. edizioa, eta aurtengoa, maiatzaren 24tik 26ra izango da.
‘Ateak zabalduz’ egitasmoaren xehetasunak eta egitaraua gaur azaldu dituzte Merkatuzarren Aizpea Otaegi alkateak, Eñaut Gracia Gizarte Zerbitzuetako zinegotziak eta erretiratuen elkarteetako kideek. Programa hori 2013an sortu zen, elkarte bakoitzean ikasturtean zehar egiten diren jarduerak herritarrei ezagutarazteko. Udalerrian, guztira, zortzi klub daude, herriko auzo ezberdinetan kokatuak. Elkarte horiek udalerriko erretiratuentzat topaleku izateko helburua dute, eta ekintza eta jarduera ugari eskaintzen dituzte urte guztian zehar.
Aurtengo ediziorako, zuhurtziagatik programan aldaketa batzuk sartu dituzte. Osasun egoeraren ebaluazioa eginda, eta ikusita elkarteetako bazkideak adinekoak eta zaurgarriak direla, egokiena baldintza berrietara egokitzea izan dela eutsi dute, eta aurtengo ‘Ateak zabalduz’ xumeagoa izango da beste urteekin alderatuta. Dena den, datozen urteetarako, osotasunean berreskuratuko dutenaren esperantzarekin azaldu dira erretiratuak.
Udalaren politika publikoetan, adinekoak eta haien ongizatea elementu garrantzitsua direla nabarmendu du Aizpea Otaegi alkateak. Egun, udalerriko biztanleen %25ak 65 urte baino gehiago ditu, eta ongizate horretan erretiratuen klubak faktore garrantzitsu bihurtu dira. Kolektibo horrek udalarentzat duen garrantziaren erakusgarri dira, adibidez, Pontika eta Galtzarabordako elkarteen obra proiektuak bukatzear daudela; sortu berri den Adinekoen Mahaia eta bertatik egindako udalerriaren bakardadearen diagnostikoa; edo pandemian zehar adineko pertsonei zuzendutako jarduera fisikoko programak.
Egitaraua
Jarduerak asteartean, hilak 24, hasiko dira, eta 10:00etatik 13:30era Merkatuzarren topaketak egingo dituzte Lagunkide-Acoge elkarteko kideekin. Espazio horretan, Lagunkide-Acogera egunero doazen pertsonek aisialdiko jarduera ezberdinez eta hamaiketako batez gozatuko dute.
Asteazkenean, hilak 25, Euskal jaia antolatu dute erretiratuek, eta 17:00etatik 19:30era herrian zehar ibiliko dira. Merkatuzarretik abiatuta, eta euskal dantza eta abesbatza taldeez lagunduta, herriko kaleak girotuko dituzte.
Egitarauari bukaera emateko, ostegunean, hilak 26, erretiratuek San Telmo museora bisita kulturala egingo dute. Azken jarduera horretan parte hartu nahi dutenek aurrez izena eman beharko dute.
Horrez gain, hilaren 24tik 26ra, hau da, ‘Ateak zabalduz’ programak irauten duen hiru egunetan, erretiratuek urtean zehar egindako lanak biltzen dituen erakusketa bat antolatu dute Xenpelar Etxean. Goizetan, 11:00etatik 13:30era, elkarteetako bazkideentzat egongo da ikusgai; eta arratsaldetan, 17:00etatik 19:00etara, herritar guztiek ikuskatu ahal izango dute.
