Erronka bikoitzari aurre egin dio Pasaia Kayakek
Kantabrian eta Galizian izan ditu marea urdinak asteburuko piraguismoko lehiak. Nesken K-4ak nabarmentzeko postua lortu du.
Erronka bikoitzari aurre egin zion Pasaia Kayakek joan den asteburuan: larunbatean Kantabriako Itsas Kayakeko Txapelketa irekia, eta igandean, Verducidon (Pontevedra, Galizia), aldiz, Kadete mailako Ur Lasaietako Espainiako Esprint Olinpikoko Kopa. Bietan erdietsitakoarekin asebete agertu dira urdinen prestatzaileak.
Larunbata, Kantabrian
Guztira 8 kilometroko ibilbidea egin behar izan zuten palistek larunbateko txapelketan, eta presio ederra zuten, inguruan jokatzen den maila handieneko probetako bat baita hori. Senior mailan, esate baterako, nazioartean lehian diharduten kirolariek ere parte hartu zuten, artean, egungo Itsas Kayakeko Europako txapeldun Walter Bouzan asturiarrak.
Lander Rodrigez eta Aritz Araneta faboritoak, beraz, onena ematera joan ziren. Rodrigez seigarren izan zen Seniorren sailkapen nagusian, 37 minutu eta 24 segundoko denborarekin, eta Araneta zazpigarren, taldekidearengandik 16 segundora. Pasaiatarren hirugarren ordezkaria, Iñigo Lois, hamabigarren izan zen.
Igandea, Galizian
Verducidoko esprintean 1.000 metroko distantzian lehiatu ziren mutilak, eta distantzia erdian neskak. K-1, K-2 eta K-4 modalitateetan, Espainia osotik etorritako 75 klubetako ordezkaritza jaso zuen probak.
Sailkapen eta finalerdi gogorren ondoren, pasaitarren 3 ontzi heldu ziren finalera, neskak nagusitu zirelarik: K-1ean, bakarkako lanean, Maialen Vitoria seigarrena izan zen C finalean; K-2an, aldiz, Vitoriak berak eta Irati Hercek osatutako ontziak B finalerako txartela lortu zuten, eta seigarren postuak bukatu zuten lehia, EAEko lehen ontzia izanik.
Azkenik, Irati Hercek, Enara Nuñezek, Kattalin Altunak eta Noa Revueltak osaturiko K-4ak lortu zuen emaitzarik onena: finalerdi gogorrenean lehiatu ondoren, A final nagusira sailkatzea lortu zuten, eta baita zortzigarren postuan bukatu ere.
Datorren asteburuan ere, atsedenik hartu gabe, erronka bikoitza izango du marea urdinak: larunbatean Kategoria nahasien maratoi modalitateko Euskadiko Txapelketa, eta kimu eta haurren Gipuzkoako Txapelketa igandean Trintxerpeko dartsenan, etxean.
