Larunbatean ez da aspertzeko astirik egongo Gaztañon
Krosa, Mus Txapelketa, haurrentzako jolasak, erakustaldiak, afari herrikoia, kontzertuak eta DJ Bull dira ekainaren 18ko proposamenak.
Gaztañoko Kroseko azken garaileak. Gaztañoko jaiak gainean dira, eta jai batzordeko kideak gutxika ezagutarazten ari dira festen egitaraua. Oraingoan, larunbateko, ekainak 18, egitaraua zabaldu dute, eta, ohikoa den bezala, adin guztietarako proposamen ugarirekin datoz. Larunbateko jarduerak goizean goiz hasiko dira ezaguna bilakatu den Gaztañoko Kros Herrikoarekin. Lasterkariak 10:30ean aterako dira auzotik, eta haien ondoren, gazteenek ere egingo dute korri. Lasterketak bukatuta, pintxo potea antolatu dute lasterkari eta ikusleentzat.
Izerdia botata, jarduerek arratsaldean izango dute jarraipena. 16:00etan, Gaztañoko Bukagaitz Elkartean, Mus txapelketa egongo da, eta 17:00etan haurrentzako jolasak antolatu dituzte gaztetxean. Arratsaldeko ekintzei bukaera emateko, berritasunekin datoz jai batzordeko kideak auzoko lokalera. Bertan, urtean zehar auzoko lokalean eskaintzen dituzten ikastaroen eskutik, erakustaldia egingo dute auzotarrei egiten dutena ezagutarazteko. Gauzak horrela, Taijiquan, euskal dantza, dantza afrikar eta pandero jotzaileek arratsaldea girotuko dute auzoko lokalean, 18:00etan.
Arratsaldeko ekintzak burututa, sabelak betetzeko unea izango da. Jai batzordeko kideek afari herrikoia antolatu dute erabilera anitzeko gune berrian, 21:00etan. Ohikoa den bezala, mozorrotuta joateko deia luzatu dute Gaztañotik, eta aurten aukeratu duten gaia 80. hamarkada da. Afarirako sarrerak egun gutxi barru salgai jarriko dituztela zehaztu dute auzotik. Horrez gain, bingo musikatuarekin emango diote bukaera afariei.
Sabelak beteta, 23:00etan kontzertuak egongo dira gaztetxean, eta oholtzara igoko diren taldeak The Dillingers, Rejects, Trilita eta Indabe izango dira. Horrez gain, ordu berean, Rock Kalean taldea auzoko txoko ezberdinetatik ibiliko da gaua girotzen, eta karpa nagusian bukatuko dute saioa. Horien ondoren, DJ Bull famatuaren txanda izango da. 02:00etan hasiko da karpa nagusian, eta gaua girotuko du goizerarte.
