Pasaiako etxez etxeko zerbitzuko langileak greba mugagabean hasiko dira
Datorren astelehenean hasiko dute hitzarmen propioa lortzeko lanuztea. Aste osoan zehar kaleak hartuko dituzte, eta babesa galdegin dute.
Martxoan atera ziren kalera estreinakoz etxez etxeko zerbitzuko langileak. Orduko argazkia da hau. 
Martxoan hartu zituzten kaleak aurrenekoz Pasaiako etxez etxeko zerbitzuko langileek, euren egoera prekarioa bistaratu eta “hitzarmen duin baten aldeko” borrokari ekiteko. Ordutik, manifestazioak, orotariko protestak eta bilerak ere egin izan dituzte Pasaiako Udalarekin nahiz Eulenekin (lehen erakundea da zerbitzuaren titularra, eta beste enpresa, zerbitzuaren kudeatzailea), baina euren aldarrikapenei “erantzun egokirik” eman ez zaiela iritzita, “langileok nahikoa dela esan dugu”.
Hitzarmen propioa exijitzen dute, gaur artean Gipuzkoako garbiketa zerbitzuen hitzarmena aplikatu baitzaie, “gure lanak sektore horrekin zerikusirik ez duenean”. Horrek, gainera, prekarietatera kondenatzen ditu Pasaian etxez etxe laguntza ematen duten langileak: “Oarso-Bidasoko lan baldintza txarrenak dituen sektoreko langileak gara”.
Hori gutxi balitz, soldatapekoek salatu dute 2020ean sinaturiko azken kontratuan Pasaiako Udalak zerbitzuaren prezioa %10,18 igo zuela, garestitze horrek langileen soldatetan inongo eraginik eduki ez zuelarik. “Aitzitik”, gaitzetsi dute, “oso-osorik enpresaren [Eulen] esku geratu da”.
Hori horrela, greba mugagabean hasiko dira datorren astelehenean, hilak 23. Hori bakarrik ez: aste horretako egun bakoitzerako protesta modu bat adostu dute, eta baita horietan babesa galdegin ere: “Pasaiako erabiltzaileen eta haien senideen laguntza eskatzen dugu, horiek baitira zerbitzuan lan baldintza kaxkarrak pairatzen dituztenak”.
Horratx egutegia:
- Astelehena, hilak 23. Kontzentrazio zaratatsua Pasaiako udaletxearen aurrean, 11:00etan hasita.
- Asteartea, hilak 24. Kontzentrazio zaratatsua Eulen enpresaren egoitzan (Tolosa hiribidea 121, Donostia), 11:00etan hasita.
- Asteazkena, hilak 25. Manifestazioa Trintxerpeko Alkateordetzatik San Pedroko frontoiraino, 11:00etan hasita.
- Osteguna, hilak 26. Pasaia Itsas Festibaleko ontziei harrera, eta kontzentrazio zaratatsua, 18:00etan, Albaolan.
- Ostirala, hilak 27. Donibaneko Bizkaia plazan langileen Barku hau ondoratzen ari da antzezlana, 12:00etan.
- Larunbata, hilak 28. Kotxe karabana 10:00etatik 12:00ak arte, udalerrian barrena gatazkaren berri emateko.
- Igandea, hilak 29. Kanpaldia udaletxearen aurrean, 10:00etan hasita.
