[Galeria] Meipiko Jai Batzordea: "Gure aurreikuspenak nabarmen gainditu dira"
Lehenengoz Donibaneko Meipi auzoko jaiak egin zituzten aurreko asteburuan. Jai Batzordeko kideak asebete gelditu dira jasotako erantzunarekin.
Joan den asteburuan egin zituzten, hilaren 13tik 15era zehazki, Donibaneko Meipi auzoko jaiak lehenengoz. Meipiko Jai Batzordeak lan handia egin du festak behar bezala joan zitezen eta erakargarri izan zitezen. Eta HITZAri egindako balorazioaren arabera, helburua bete dute: “Egiten dugun balantzea oso baikorra da. Izan ere, gure aurreikuspenak nabarmen gainditu dira”. Pozik daude, oso, jaiek emandakoarekin. 2020an baitziren egitekoak auzoko lehen jaiak, baina pandemiak den-dena hankaz gora utzi ondoren, bi urtez itxaron behar izan dute sanjuandarrek estreinazkoz Meipiko jaiez gozatzeko.
Batzordekideek azaldu dute orotariko adineko nahi eta gustuetara iristea lortu dutela, asteburu bateko jaiak izanda ere askotarikoak izan direlako jai egitarauan bildutakoak, “horixe zen, hain zuzen, gure asmoa”. Auzokide ezagun bati aitortza egiteko parada izan dute, aldi berean, festetan: Juanma Real Piraña. Hark bota zuen festa aroa hasteko txupina.
Meipiko Jai Batzordeko kideek berretsi dute festen antolaketan ilusio handia jarri dutela, eta den-dena aurrera ateratzeko ezinbesteko izan dela batzordekideen eta auzokideen konpromisoa eta lana. Horregatik, esker bereziak eman dizkiete sanjuandarrei, merkatariei eta ostalariei eman dieten laguntzagatik. “Benetan mila esker denei… eta datorren urtera arte!”.
Jarraian, argazki galerian, Meipiko Jai Batzordeak HITZAri emandako argazkien bidez festen errepaso grafikoa:
