Hemen da Eztena arte eszenikoen jaialdiaren XIV. edizioa
Emanaldiak ekainaren 5etik 12ra izango dira Lekuona Fabrikan, Niessen auditorioan eta Mikelazulo kultur elkartean.
Aizpea Otaegi, Maite Gartzia eta Eztenako kideak. Argazkia: Karrera. Beste urte batez hemen da Eztena arte eszenikoen jaialdia. Honakoa izango da XIV. edizioa, eta ekainaren 5etik 12ra arte eszenikoez gozatu ahal izango da Errenteria-Oreretako agertoki ezberdinetan: Lekuona Fabrikan, Niessen auditorioan eta Mikelazulo kultur elkartean. Aurten ere, egitarau anitz eta zabalarekin datoz, askotariko proposamenekin.
Eztena Mikelazulo kultur elkarteak, Zizt! kultur elkarteak eta Errenteriako Udalak elkarlanean antolatzen duten jaialdia da, eta gaur aurkeztu dute Donostiako Udal Liburutegian Aizpea Otaegi alkateak, Maite Gartzia Kultura zinegotziak, eta Eztenako kide diren Oier Guillanek, Ainhoa Alberdik eta Iraia Eliasek.
Aurtengo egitaraua ekainaren 5ean, igandea, hasiko da Metrokoadroka taldearen Zeozertan dabil baina ez dakit zertan emanaldiarekin. Lehen ikuskizun hori Lekuona Fabrikan izango da, 19:00etan. Gainontzeko emanaldiak ekainaren 10ean, 11n eta 12an izango dira, eta egitarau osoa Eztenako webgunean ikus daiteke.
Eztenako kideek zehaztu dute urtero berritasunak sartzen ahalegintzen direla. Aurten, lehenengoz, Zizterberg bekak sortu dituzte, sortzaileen proiektuak bultzatzen dituztenak. Deialdia oso arrakastatsua izan dela aipatu dute. Guztira 18 proiektu anitz aurkeztu dira, eta 6 aukeratu dituzte, eta antolatzaileek nabarmendu dute “pozgarria” izan dela ikustea “jendea sortzeko irrikan eta emateko gogoz” dagoela. Proiektuak saritzeko garaian prozesuan edo hastapenean dauden lanak hautatu dituzte. 6 proiektu irabazleak Lekuona Fabrikan egongo dira jaialdian zehar, eta, horrez gain, euren piezak interpretatuko dituzte ekainaren 11n, Niessen auditorioan, 18:00etan.
Elkargunea eta ikusle kluba
Jaialdia ekainaren 5ean hasiko bada ere, ekainaren 10ean Mikelazuloko elkargunearen inaugurazioa egingo da, 18:00etan. Eztenako kideek azaldu dute “jaialdiaren testuinguruan topalekuari beti garrantzia” eman zaiola, eta bertan “denen artean egoteko eta gozatzeko espazioak sortzen” direla.
Horrez gain, ikusle klub bat egongo da martxan jaialdian zehar. Iazkoa izan zen ikusle kluba antolatu zuten lehen aldia, eta “oso ondo” funtzionatu zuela eutsi dute Eztenakoek. Aurten ere bueltan izango da, eta bi emanaldiren bueltan egongo da eraikia. Parte hartzen dutenek, formazioa jasoko dute antzerkiaren inguruan, eta emanaldiaren bukaeran, solasaldiak egongo dira ikusitakoa komentatu ahal izateko. Saio horiek euskaraz izango dira.
Eztena arte eszenikoen jaialdiko emanaldietako sarrerak eskuragarri daude dagoeneko. Sarrera horiek doakoak izango dira, eta Eztenako webgunean eskuratu daitezke.
