[Erreportajea] Ekintza txikiekin aldaketa handia egiteko patruilak
Auzolanean komunitate iraunkorragoak sortzeko ekintzak gauzatuko dituzte ‘ekopatruilek’. Antxon eta San Pedron dagoeneko elkartu dira bizilagunak, ‘Mater’ Ontzi Museoak animatuta.
Marealtara isurtzen den zaborrarekin kezkatuta agertu ziren bizilagunak. 
Hilaren 11n Mater Ontzi Museo Ekoaktiboko kide Janire San Sebastian Pasai Antxoko Kultur Etxean izan zen, gerturatutakoei Ekopatruilen Sarearen berri eman eta barruti horretan taldetxoa sortzeko asmoz. Bizilagunek bultzaturiko iniziatiben bidez, eta betiere Mater-ek dituen baliabideak lagun izanik, komunitate iraunkorrago baten aldeko ekintzak bultzatuko dituen lantaldea da ekopatruila.
San Pedron, dagoeneko, emanak dituzte pausoak bide horretan, eta joan den asteazkenean aurkeztu zuten jendaurrean, ontzian bertan, gaur arte ibilitakoa. Barruti horretako boluntario batek formakuntza jaso zuen azaroan ontzi museoko lantaldearen eskutik, eta egitasmoa gainontzeko bizilagunei zabaldu nahi diete orain; horrela, tokiko ekintza taldea, ekopatruila, sortuz.
Talde horiek Mater eta Gipuzkoako beste hainbat udalerritako ekopatruilekin batera (hamar udalerritan egongo da aurten proiektua martxan), hainbat tresna pedagogiko baliatuko dituzte tokiko ingurumen hezkuntza programa sortzeko.
Hurrengo hitzordua
Antxon dagoeneko ezarri dute taldeari forma emateko hurrengo hitzordua: hilaren 23an, 18:30ean, Antxoko Kultur Etxean.
San Sebastianek gogorarazi du bizilagunen kezka, behar eta denboraren arabera antolatuko direla ekintzak, «ez dugu nahi hau inorentzat pisu bat bihurtzea». Aurreko bilkuran zenbait kezka jarri zituzten mahai gainean Antxoko bizilagunek, besteak beste, Marealtaren garbiketa, arratoiak, eta Molinao inguruko zaborra.
