Akordioa egikaritu arte mobilizazioei eutsiko diete
Manifestazioa egin dute eguerdian Altzate igerilekuko eta Bekoerrota kiroldegiko langileek. Akordiorik ezean, mobilizazioekin jarraituko dute.
Gaurko manifestazioaren irudia. Altzate igerilekuko eta Bekoerrota kiroldegiko langileek mobilizazioa egin dute, berriz ere, gaur eguerdian. Gurutze Santuaren plazan bildu, eta manifestazio zaratatsua egin dute herritik zehar. Urtebete daramate borrokan langileek: 2012tik izoztuak dauzkaten soldaten eguneraketa nahi dute, langileen arteko lan ordainsarien arteko arrakalarekin bukatu, eta instalazioetan berrikuntza lanak egitea zerbitzu “duina” eman ahal izateko. Horiek langileen hiru eskaera nagusienak.
LAB sindikatuak jakinarazi duenez, udalak jada landua du langileentzat interesgarria izan daitekeen proposamen bat. Hori, gatazkaren hirugarren aldearekin negoziatzen ari da udal erakundea, hain zuzen, instalazioen kudeaketaren ardura duen BPXport enpresarekin. Baina sindikatuak gaur-gaurkoz duen informazioaren arabera, oraindik ere ez da akordiorik. “Beraz, udalarekin eta BPXportekin langileak mesfidati direnez, akordioa egikaritu bitartean mobilizazioekin jarraituko dute langileek”.
Hilaren 5 eta 7an greba egin zuten langileek, LABen ekimenez. Asteazkenean ere martxa egin zuten, gaur bezala, langileek. Egoera konpondu ezean, hilaren 27rako ere geldialdi deialdia egin dute, 09:00etatik 11:00etara.
