"Jaiak herritik eta herriarentzat" nahi ditu Oaingoz Hauk
"Hausnarketa" prozesu baten ondoren, aurtengo Kuadrilen Eguna "ezberdina" izango da. Ez da bazkaririk egingo, bai, ordea, poteoa eta kamisetak.
Oaingo Hauko kideak. Madalenak gainean dira eta Oaingoz Hau mugimendua jaiak prestatzeko zereginetan dabil. Aurten, baina, “hausnarketa” prozesu bat medio, aldaketekin datoz, gehienbat Kuadrilen Egunari erreferentzia egiten diotenak.
Oaingoz Hau mugimenduak argi dauka “jaiak herritik eta herriarentzat” izan behar dutela txosnagunean. Mugimenduko kideek onartu dute “ia ezinezkoa” egin zaiela Madalenetako bost egun, bi gune, hamaika ekitaldi eta tarteko Kuadrila Eguna antolatzea. Hori dela eta, aurtengo Kuadrilen Eguna “ezberdina” izango dela iragarri dute.
Kuadrilen Eguna urteetan eraldatuz joan da, baina Oaingoz Hauko kideek baietsi dute beti “auzolanean eraikitako espazio aske, libre, feminista, ez arrazista, ez homofoboa eta euskalduna” bultzatu eta sustatu dutela. Helburu hori, baina, “%100-ean lortu ez” dutela nabarmendu dute: “Auzolanean ari zirenekiko errespetu faltak, jarrera matxistak eta euskararekiko gutxiespenak jasan ditugu besteak beste. Eta ez, txostagunean ez dugu horrelakorik onartuko”.
Egoera horren harira, Kuadrilen Egunak “hausnarketa berri” bat behar zuela konturatu ziren antolatzaileak, eta erabaki zaila izan bada ere, aurten bazkaririk antolatuko ez dela konfirmatu dute. Horrek ez du esan nahi Kuadrilen Eguna ospatuko ez denik, izan ere, “beste era batera” antolatuko dute. Alde batetik, kamisetak aterako dituzte “eguna modu sinbolikoan” ospatzeko. Kamiseta horiek 10 eurotan eskuratu ahal izango dira leku, data eta ordutegi hauetan:
- Maiatzak 26, osteguna: 18:00etatik 20:00etara, Zumardian.
- Maiatzak 27, ostirala: 18:00etatik 20:00etara, Zumardian.
- Maiatzak 28, larunbata: 11:00etatik 13:00era, Zumardian.
Bestalde, Kuadrila Egunean, poteoa ere izango da. Arratsaldeko 17:00etan hasiko da, eta herriko kaleetan barrena murgilduko da DJ Bull eta DJ Txankletarekin.
Bukatzeko, maitasun eta esker hitzak izan dituzte “urteetan Kuadrilen Eguna berezia” egin duten oreretar horientzat, “errespetuz auzolanean” aritu direnentzat, txosnagunea zaindu dutenentzat eta “beti ondoan” izan direnentzat.
