Koldo Mitxelena BHI-ko eraikin erantsian, Mariasun Landaren izena
Idazlearen izena ikastetxearen egunerokotasunean egongo da aurrerantzean, eta Landari oroimenezko plaka bat eman diote.
Mariasun Landa, udal ordezkariak, ikastetxeko ordezkariak eta ikasleak. Koldo Mitxelena BHI-ko eraikin erantsiak Mariasun Landa idazle errenteriarraren izena du jada. Institutuko 50. urteurrenaren ospakizunen harira, duela bi aste institutuan bertan egin zitzaion omenaldian jarri zioten eraikinari izen berria, Landa ikastetxearen egunerokoaren parte izateko. Gaur, baina, ekitaldi formalagoan, Errenteria-Oreretako udaletxean egin diote aitortza udal ordezkariek eta ikastetxeko zuzendari, irakasle eta ikasleek.
Arantxa Igartua ikastetxeko zuzendariak azpimarratu du, ikastetxeko kolektibo guztiek “aho batez” babestu zutela eraikin erantsiari Mariasun Landa izena jartzeko proposamena. Eraikinari idazlearen izena jartzean eta hari erreferentzia egiterakoan, “berarengan miresmena eta maitasuna” eragingo dizkiela nabarmendu du zuzendariak. “Sentimendu guztiak” Javi Lamarkak diseinatutako plaka bateak gauzatu direla eutsi du Igartuak. Plaka hori eraikinean dago jada, eta ikastetxearen egunerokotasunaren parte direnek egunerokoan ikusi ahal izango dute, baina Mariasun haietaz ere gogoraraztea nahi dutela baietsi du zuzendariak. Hori dela eta, plakaren erreprodukzioa eman diote Landari, hark ere oroimen hori etxean eduki dezan.
Hartu-emana bi norabidetakoa izan da, eta Mariasun Landak esker onez jaso du ikastetxeak eta ikasleek egin dioten errekonozimendua. Ikastetxeko DBH 1. mailako sei ikasle udaletxean izan dira ekitaldian, institututik nahi dutena baita “begirada etorkizunera proiektatzea, belaunaldiz belaunaldi pasatzen jarraituko duen lekukoa biltzen duen belaunaldiaren parte baitira”.
