[Erreportajea] Azken urteko uzta dastatzeko, txotx bikoitza aurten
COVID-19ak azken bi urteetako festa zapuztu ondoren, indarberrituta itzuliko da Sagardo Eguna. Bihar hemezortzi sagardogileren zukua dastatzeko aukera izango da, goizez eta arratsaldez gainera.
2019an egin zuten azken Sagardo Eguna Oiartzunen, orduko irudia da hau. Bihar Oiartzunen txanda izango da, sagardoaren festa handiak jai giroz beteko du Elizalde, egun osoz gainera. Urteko uzta dastatzeko aukera izango dute oiartzuarrek, aurten bai, pandemiagatik azken bi edizioak bertan behera gelditu baitziren.
Bi urteko hutsunea «luzea» izan dela aitortu du antolaketa lanetan dabilen Girizia elkarteko Gaizka Garziak. «Herritarrak bezalaxe gu ere gogotsu gaude, bazen garaia berriro plaza lepo beteta ikusteko. Modu natural batean sozializatzeko gogoz daude herritarrak, hori sumatzen ari gara inguruan. Ea eguraldi ona egiten duen, baina giro ona dagoen bitartean, berdin du eguraldiak!», esan du. Joan den irailean hasi ziren lanean, «ilusio bikoitzarekin», Garziak zehaztu duenez. Orduan, sagar biltze herrikoia egin zuten, eta arrakasta handikoa izan zen gainera. Ordutik, motorrak berotzen ibili dira Giriziako kideak.
Berritasunekin dator biharkoa. Hori aurreratu du oiartzuarrak. Aurreko edizioetan arratsaldez dastatu izan ohi da sagardoa, baina aurten goizean ere txotx egiteko apustua egin dute (12:00etan egingo dute, udaletxe atzeko plazan). Goiza biribiltzeko, azoka egingo dute Done Eztebe plazan (10:00etatik 14:00etara), herriko eta inguruko jaki eta edariak dastatzeko aukera egongo da bertan.
18:00etan egingo dute txotx handia, Done Eztebe plazan. Urtero bezala, herritar bat omenduko dute, hark hasiko du festa.
Goiz eta arratsaldean zehar, orotara, hemezortzi sagardogileren zukua dastatzeko aukera izango da. Edalontziak plazan bertan eros daitezke, bost euroren truke (pintxoa barne).
Baserriari keinu bat
Sagardoa izango da biharko protagonista nagusia, zalantzarik gabe, baina Garziak gaineratu du aurtengoari «ukitu berezia» eman nahi izan diotela. Baserri giroa presente eduki nahi dute, horregatik baserritarrez jantzita jaisteko deia egin diete oiartzuarrei Girizia elkartekoek. «Ez dadila soilik sagardoa izan protagonista, baserriko munduari keinu bat egin nahi diogu». Lehiaketa, sariak eta hainbat «sorpresatxo» ere egongo direla aurreratu du antolatzaileak.
