Agote: "Festibaletik gehien gozatu nuena Antxoko bertso saioa izan zen"
Pasaia Itsas Festibaleko presidente Xabier Agotek ekitaldiaren balorazioa egin du. Antxotarrengandik sekula baino gertuago izan dira barkuak.
Xabier Agote, Pasaia Itsas Festibaleko presidenteak, atzo bukatu zen jaialdiaren balorazioa egin du. Orokorrean asebete agertu da hilaren 26tik 29ra badia astindu duen kultur ospakizunarekin: “Hobeezin joan da. Hamarretik, hamar”.
PIF 22aren arrakastak bi ardatz izan dituela uste du lehendakariak: eguraldi eguzkitsua eta istripurik eza. “Halakoetan funtsezkoa da eguzkia”, aitortu du, “eta hori lagun izan dugu, iragarpenen kontra, ia uneoro”. 135.000 bisitari hurbildu dira Pasaiara azken lau egunetan (2018an 125.000tik gora izan ziren), eta zifragatik pozik agertu ez ezik, xehetasun bat egin du: “Jende ugari da hori eta pozik egon dira, ez da istripurik egon”.
Antxotarrengandik inoiz baino gertuago
Une bat nabarmentzeko eskatuta, ez du zalantzarik egin: larunbateko Antxoko Denboraren tunelean bertso saioa. Amets Arzallus eta Jon Maia, bertaratutakoen sorpresarako, Molinao erreka barrutira sartzen den tuneletik agertu ziren, Katuen etxadian, eta bertatik, txalupetan, eskaini zuten saioa. “Oso hunkigarria izan zen. Bereziki disfrutatu nuen”, Agotek.
Aitortu du Izaskun Gomez alkateak hala espresuki eskatuta erabaki zuela presidenteak erreka erabiltzea, “erronka zaila” baita PIFa Antxoko barrutiari gerturatzea, “festibalaren lehorreko jarduera hertsiki lotuta baitago itsasokoarekin”. Hausnartzen ari zela, garai batean Molinaon amarratuta egon ohi ziren txalupak etorri zitzaizkion gogora lehendakariari, eta bertatik tiraka sortu zitzaion ideia.
“Nire batela hartu eta, bi lagunekin batera, 180 metroko luzera duen tunel horretan sartzea erabaki nuen”. Bidean oztoporik ba ote zen egiaztatu behar zuen emanaldia egingarria izango ote zen jakiteko. “Ez da ezer ikusten, linternekin joan behar duzu bide osoan. Oso ikusgarria da!”. Pasabidean trabarik topatu ez, eta bertsolariak Antxora bertatik sar zitezen erabaki zuen Agotek.
Asebete agertu da, oso, esperimentuak emandakoarekin: “Jendea goitik begira eta gu uretan, bazirudien anfiteatro txiki batean-edo ginela. Ea hurrengo edizioan etekin handiagoa atera diezaiokegun errekari, beharbada egunero bertan zerbait eginez, txalupa gehiago sartuz, musikariak edota, besterik gabe, kontatzeko zerbait dutenak…”.
Hurrengo ekitaldira begira
Aurtengo festibalaren ajearekin oraindik ere, 2024kora begira jarri da presidentea. “PIF eduki aldetik aberasten joan dadin nahi dut”, adierazi du Agotek; geroz eta itsasontzi gehiago ekarri eta lehorreko jarduera aberasten joatea da helburua.
Horretarako, argi du zein bide jarraitu nahi duen: aurten lehen aldiz urratu dituzte iraunkortasunaren eta elkartasunaren bidezidorrak, eta hortik aurrera egiteko asmo guztizkoa du Albaolaren sortzaileak. “Mendeetan atzera egiten saiatzen gara ontziekin, eta funtsezkoa da mendeetan atzera ere egitea itsasoa egon izan den bezain garbi izan dezagun berriro, eta baso osasuntsu zein emankorrak, ontziak egurrez hornitzeko”.
Bestalde, sinetsita esan du “elkartasun zubiak” eraikitzen jarraituko duela itsas festibalak: “Dudarik ez dut: kultura ez da helburua, baizik eta bidea, erreminta eraikitzaile bateratua”. Hori Albaola sortu zenetik ikasten joan dela aitortu du, “gizartetik sortutako erakunde bat gara, eta mundua hobetzeko horrelako proiektuak egin behar ditugu”.
