Udala haiekin "zorretan" dagoela esan dute kirol instalazioetako langileek
Udal aldizkariaren gai nagusiarekin lotu dituzte euren aldarrikapenak Bekoerrota kiroldegiko eta Altzate igerilekuko langileek.
Lezoko kirol instalazioetako langileek Mendekoste Jaiak baliatu dituzte euren aldarrikapenak jendartera zabaltzeko. Esan dute udala haiekin “zorretan” dagoela. Izan ere, udala egunotan ari da udal aldizkariaren zenbaki berria banatzen, eta bertako albiste nagusiena udalak zuen zorra hutsean gelditu dela da. Langileak ez daude ados horrekin, adierazi dute udal erakundeak haiekin duela zorra.
Asteak daramate mobilizazioekin Altzate igerilekuko eta Bekoerrota kiroldegiko langileek. Luzeagokoa da haien aldarrikapenen aroa, ordea. Laburrean, honakoak dira haien eskaerak: hainbat urtez izoztuta dauzkaten soldatak eguneratzea; langileen arteko soldata arrakalarik ez dadila egon; eta kirol instalazioen egoera hobetzea.
Zentzu horretan, hiru aldeko negoziazioetan dabiltza langileak, udala, eta kirolguneak kudeatzen dituen BPXport enpresa. Datozen egunetan biltzekoak direla adierazi diote LAB sindikatuko kideek HITZAri.
