[Erreportajea] Elektrizitate enpresa handiei «nahikoa da» esan diete
Energia berriztagarrien komunitatea osatzeko martxan jarri dira hainbat herritar, udalarekin eta Goienerrekin elkarlanean, «burujabetza energetikoa lortzeko». Atzo egin zuten lehen bilera.
Udaleko eraikinetan bezalaxe, hainbat etxebizitzetan ere plaka fotovoltaikoak jarri nahi dituzte, besteak beste. Ingurumenaren zaintzarekin kezkati eta energia kontsumo iraunkorrarekin sentsibilizatuta dagoen herritar talde bat lanean jarri da, herrian energia komunitate bat osatzeko asmotan. Udalarekin eta Goiener kooperatibarekin lankidetza hasi berri dute, eta atzo lehen bilera irekia egin zuten. Bertan «etorkizunean garrantzitsua izango den proiektu baten lehen harria» jarri zutela kontatu du pozik Hirigintza zinegotzia den Agustin Lekuonak.
Enpresa elektriko handiekiko egun herritarrek duten menpekotasunarekin bukatu nahi dute, hori da asmoa. «Hemen eta guretzako sortutako energia kontsumitzeko pausoak eman nahi ditugu, enpresa boteredun horiekiko dependentzia hori galtzeko». Etorkizuna «oso ilun» ikusten du Lekuonak, bereziki azken hilabeteetan argindarrak izandako igoerak egoera konplikatua dela berretsi baitu bere ustez. «Pobrezia energetiko asko dago, agian hemendik urte batzuetara familia askok ezingo dute argindarra ordaindu, hori ekidin nahi dugu».
Burujabetza hori lortzeko hainbat azpiegitura sortu nahi ditu udalak, hori aurreratu du zinegotziak. Baina aurretik komunitatea sortzeko buru-belarri ariko direla dio. Hainbat bilera egingo dituzte aurrerantzean, «baloratzeko zer eta nolako energia nahi dugun guretzako, burujabetza hori gertuago egon dadin».
Oraindik ekintzarik adostu ez duten arren, Lekuonak aipatu du asmoa dutela, udaleko eraikinetatik harago, herriko hainbat eraikin partikularretako teilatuetan ere plaka fotovoltaikoak jartzeko. «‘Nahikoa da’ esan behar diegu enpresa elektriko handiei, beraiek duten botere hori herritarren artean banatu behar da, subiranotasuna lortu behar dugu, ez baitakigu biharko eguna nola datorren».
Urtebeteko epea
Udalaren aurreikuspenen arabera, hemendik urtebetera komunitate hori lanean jarriko da, orduan, ekintza zehatzekin hasi ahal izateko. Prozesuan zehar herritarrak protagonista nagusi izango direla hitz eman du Lekuonak: «Beraiek erabakiko dute zer nahi duten». Udala eta Goiener «bidelagun» izango dira
