Muturreko prekarietateak hiltzen duela salatu dute oiartzuarrek
Astelehenean lanean zebilen langilearen heriotza salatzeko elkarretaratzea egin zuten atzo, LAB, Sortu eta Ernaik deituta.
Astelehenean lanean zebilen langilearen heriotza salatzeko elkarretaratzea egin zuten arratsaldean Done Eztebe plazan hainbat lagunek, Prekarietatea hiltzailea. Aski da lemapean. LAB, Sortu eta Ernaik egin zuten deialdi bateratua.
Bertan salatu zutenez, astelehenekoa 2022an bere lanpostuan hildako 36. herritarra izan da. “Hildako langilearen inguruan egin dezakegun hausnarketa, gogorra bezain errealista da. Autonomo bat eraikuntza lanean dagoen lan osasun araudiaren babespean dago. Beste esparrutan ez bezala eta kontrata nagusiak dauka langile guztiaren erantzukizuna, eta lan osasuneko bermea eskaini beharra”, esan zuten atzoko mobilizazioan.
Autonomoak “kate luze baten azken katebegia” direla erantsi zuten, “autonomo bezala lan egin beharrean por cuenta ajena delako langileak bezala lan egiten dutela”. Heriotza hauek “muturreko prekarietatea” dagoela agerian utzi dutela esan zuten, eta “kapitalismoaren erritmoari erantzuten” diotela heriotzek.
“Zalantzarik gabe abiadura handiz lan egin beharra arrisku faktore bat da. Horregatik arduradun politikoei beharrezko bitartekoak jar ditzatela exijitzen diegu arrisku hauek gutxitzeko eta hilkortasun tasa desagertzeko”, esan zuten azkenik.
