36,6 tona hondakin konpostatu dira aurten Errenteria-Oreretan
Konpostarekin bat egin duten familiak 150 dira orotara momentuz, 106 etxe-konposta eginez, eta 44 auzo-konposta.
Errenteria-Oreretan 150 familia dira etxeko-konpostajea edo auzo-konpostajea egiten dutenak. Lehenak 106 dira, eta auzokoan 44 ari dira. Denen artean, aurten 36,5 tona hondakin konpostatu dituzte, 24 etxe-konpostean eta beste 12,5 auzokoan. 2014an jarri zuen Errenteriako Udalak konpostaje programa, hondakin organikoen autokudeaketa sustatu eta errazteko, jatorrizko hondakinen bereizketa handituz eta bihondakinen prebentzioan sakonduz.
Konpostajea egiten dutenek %40eko hobaria dute euren hondakinen udal tasan konpentsazio modura. Beraz, aurten, 150 etxebizitza horietako biztanleek tasa horretan beherakada oso nabarmena izango dute. Horrez gain, euren jardunarekin, hondakinak gutxitzeaz gain, kalitate handiko ongarri naturala sortzen dute konpostarekin, “gure udalerriko lurzoruetara materia organikoa ekartzen duena eta, beraz, emankortasuna hobetzen duena.
Etxeko-konpostajea etxebizitza familiabakarretan bizi eta lorategia duten pertsonentzat izan daiteke egokia. Eskala txikian konpostatzen dute, lorategi edo baratzeetan jartzen diren banakako konpostagailuak erabiliz: inora desplazatu gabe, euren hondakin organikoak kudeatzen dituzte.
Auzo-konpostajea, berriz, banakako konpostagailua jarri ezin, baina egitasmoarekin bat egin nahi dutenentzako baliabidea da. Udalak ezartzen ditu eremuak, eta orotara, bost daude herrian: Agustinetan, Alabergan, Fanderian eta bi Gaztañon.
