Atletismo eskolako gazteek denboraldia itxi dute
Kirolari gazteen maila bikaina izan da, eta domina eta ohorezko postu ugari lortu dituzte lehiatutako txapelketetan.
Errenteria Atletismo Taldeko kirolari gazteak. Errenteria Atletismo Taldeko atletismo eskolako gazteek denboraldia itxi dute oso emaitza onekin. Aurtengo sasoian 90 kirolari gazte izan dituzte lehian hiru mailatan: benjaminetan, kimuetan eta infantiletan. Maila guztiek eskolarteko txapelketetan hartu zuten parte, eta horietako proba bat etxean lehiatu zuten, Beraunen.
Kimuen mailako eskolarteko Gipuzkoako Txapelketan, gazteek zazpi domina lortu zituzten, urrezko hiru, zilarrezko bi eta brontzezko beste bi. Neskek, gainera, bigarren postuan bukatu zuten 4×60 metroko erreleboetako proba, Gipuzkoako txapeldunorde izanik. Horrez gain, neskak kluben arteko Gipuzkoako Txapelketan hirugarren izan ziren.
Infantiletan ere gazteek lortutako emaitzak bikainak izan ziren Gipuzkoako eskolarteko bakarkako eta taldekako txapelketetan. Bakarkakoari dagokionez, urrezko sei domina, zilarrezko bi eta brontzezko bat lortu zituzten gazteek. Gainera, taldekako txapelketan, neskak laugarren izan ziren, eta mutilak, bosgarren.
Denboraldiaren arrakasta ikusita, sei infantilek Gipuzkoako Atletismo Federazioak antolatzen duen Aste Santuko Campusean parte hartzeko gonbidapena jaso zuten; eta horietako bost maiatzaren 28an egin zen Euskadiko Txapelketan izan ziren. Euskadiko Txapelketan emaitza ezin hobeak lortu zituzten kirolariek, izan ere, euren markak eta denborak hobetzeaz gain, lau domina eskuratu zituzten, urrezko bi eta zilarrezko beste bi.
Denboraldi bukaerako ekintza moduan, iragan ostiralean kirol topaketa bat egin zuten Beraungo atletismo pistan kirolarien eta familien artean; eta sasoia behar bezala ixteko eta agurtzeko, asteburu honetan, hilak 25 eta 26, atletismo eskolako gazteak Zarautzera joango dira.
Irailean, ate irekiak
Aurtengo denboraldia itxi badute ere, datorrena prestatzeari ekingo diote uda ondoren. Hori dela eta, irailean ate irekien jardunaldiak abiatuko dituzte ahala nahi duenak atletismoa probatu dezan. Maila horiek honakoak dira:
- Benjaminak (2013-2014).
- Kimuak (2011-2012).
- Infantilak (2009-2010).
- Federatu gazteak (2005, 2006, 2007, 2008).
Informazio gehiagorako, interesdunek atleticorenteria@gmail.com helbide elektronikora idatz dezakete.
