Errenteriako Udalak eta Aranzadik Añarbeko flora fungikoaren azterketa berri bat egingo dute
Ikerketa udan hasi eta urte bukaerara arte luzatuko da, eta Añarbeko mikrofloraren ezagutza handitzen lagunduko du.
![](https://oarsoaldea.hitza.eus/site/files/2022/06/onddoak.jpg)
Errenteriako Udalak eta Aranzadi Zientzia Elkarteak Añarbeko onddoei buruzko ikerketa bat abiatuko dute. Ikerlanak bi helburu ditu: habitaten eta espezieen arteko egungo egoera zein den aztertzea, eta egingo diren kontserbazio lanetarako datu aberasgarriak lortzea. Hala, 2007. urtean egin zen ikerketari jarraipena emango diote. Bertan, 219 espezie katalogatu ziren; horietatik 77 Gipuzkoan lehendik aipatu gabekoak, 11 Araba, Bizkai eta Gipuzkoan bildu gabekoak eta Iberiar Penintsulako onddo mehatxatuen Lista Gorriko 4 espezie.
Añarbeko basoa inguruan hoberen kontserbatu diren basoetariko bat da. Esate baterako, bertan daude Gipuzkoa eta Bizkaiko pagadi-harizti baso handienak. Hamaika bizidunen gotorlekua osatzen duen ingurune naturala da, eta, bizidun horien artean, onddoak nabarmendu behar dira: naturako kate-trofikoaren parte handiena osatzen dute.
Azterketa honekin, beraz, bertako onddoen aberastasuna eta bizidun horien bizi baldintzak nolakoak diren jakin nahi da, Añarberen egungo egoera ezagutu eta bere etorkizuna hobetzeko. Ikerketa urte amaierara arte luzatuko da.