Elizondo eta Legorburu saritu dituzte 'Kontatu bihotzarekin' ipuin lehiaketan
Nerbioi Ibaizabal ACAPK Parkinson elkarteak antolatzen du lehiaketa. Hain zuzen, parkinson gaixotasuna dute hizpide ipuinek.
Ainara Elizondo eta Iñigo Legorburu, gainontzeko saritu eta finalistekin. Ainara Elizondo hondarribiarrak eta Iñigo Legorburu errenteriarrak sari bana lortu dute ACAPK elkarteak antolatzen duen Kontatu bihotzarekin ipuin lehiaketan. Ekainaren 24an ospatu zen sari banatze ekitaldia Barakaldoko Clara Campoamor kultur etxean. Elizondok euskarazko ipuin onenaren saria eskuratu du Ispilu itsua lanarekin, eta 500 euroko saria eta diploma lortu ditu. Legorbururen Fatimaren eskutik lanak bigarren saria jaso du, eta 250 euroko saria eta diploma. Horrez gain, bi egile sarituen obrak liburu formatuan argitaratuko dira gainontzeko saritu eta finalistekin batera.
Biak ala biak aurrez saritutakoak dira lehiaketa honetan. Izan ere, Elizondo lehiaketak dituen hiru edizioetan izan da saritua, bi aldiz irabazita, eta Legorburu bitan izan da bigarren. Oraingo honetan, Elizondok parkinsonak eta burugogorkeriak jotako Aurelio eta Ekain bilobaren arteko harremana izan du hizpide. Legorburuk, berriz, Irungo aterpetxean kokatu du istorioa, eta arrazismoa, aurreiritziak eta topikoak landu ditu.
