Tailer berria Habian!-en Anne Gago moda diseinatzailearen eskutik
Ostegun honetan izango da, ekainaren 30ean, 17:00etatik 19:30era, Torrekua eraikinean. Parte hartzeko ez da josteko ezagutzarik behar.
Habian! Inkubagailuak poltsa limosnaria egiteko sorkuntza tailer bat antolatu du ekainaren 30erako. Tailerra Anne Gago moda diseinatzaile eta inkubagailuko egoiliarrak gidatuko du, eta 17:00etatik 19:30era izango da, Torrekua eraikineko hirugarren solairuan. Bertaratutakoek erabilera anitzeko poltsa hori egiteko aukera izango dute.
Parte hartzeko 16 urte baino gehiago eduki behar dira, eta ez da josteko aurretiazko ezagutzarik behar. Izena emateko hiru bide daude: habian@oarsoaldea.eus helbidera mezua bidaltzea, 943 494 129 telefonora deitzea edo inprimaki hau betetzea. Epea ekainaren 29an amaituko da, eta tailerrean parte hartzeak 20 euroko kostua izango du.
Habian! Inkubagailua Errenteriako eta Oarsoaldeako ekonomia eraldatzeko lanean dabil, sormena eta lankidetza oinarri hartuta. Hori dela eta, Habian!-ek laguntza ematen die artisautzarekin eta bestelako lanbide sortzaileekin proiektuak dituzten ekintzaileei, euren jarduerak garatzeko gune bat izan dezaten. Gauzak horrela, beraz, tailerrak bi helbururekin sortzen dira: alde batetik, bertako artisten lanak eta inkubagailuaren barruan garatzen dena ezagutarazteko; eta, bestetik, lanbide sortzaileetara hurbiltzeko interesa eduki dezaketen pertsonak gerturatzeko.
