Moda eta ehungintza tailerrak antolatu dituzte uztailean Habian!-en
Moda kontsumitzeko egungo erari buruz sentsibilizatzea eta hori aldatzeko alternatibak eskaintzea da helburua.
Torrekua eraikina. Bertan egingo dira tailer guztiak. Uztailean zehar, sormena garatzeko modaren eta ehungintzaren arloko tailerrak prestatu dituzte Habian! Inkubagailuan. Tailerrak Torrekua eraikinean egingo dituzte, eta inkubagailuan lan egiten duten sortzaileak izango dira bideratzaileak. Saioak herritar orori zuzenduta daude, eta moda kontsumitzeko modu berrien inguruan sentsibilizatzea eta modaren munduan modu ludikoan murgiltzea dute helburu. Era berean, egun ehungintzak bizi duen paradigma aldaketaren garrantzia azpimarratu nahi da, beste aukera batzuk eskainiz: ehungintzaren iraunkortasuna, moda kontzientea, slowfashion-a eta tokiko kontsumoa. Tailerren inguruko informazio osoa, hemen aurki daiteke.
Tailerrak inkubagailuko sei egoiliarrek emango dituzte: Saioa Matxain Mugika (SAI–SUO markaren sortzailea eta moda diseinatzailea), Anne Gajate Gago (ANNE GAGO markaren sortzailea eta moda diseinatzailea), Ruben Pantiga (moda argazkilaritzan espezializatua eta KIBO marka kontziente eta iraunkorraren sortzailea), Marta Marek (jostailuen eta material sentsorial didaktikoen arloko Marta Sensorial markaren sortzailea), Maite Anton Mugertza (Txatxala markarekin oihalezko osagarriak egiten ditu) eta Jone Zubizarreta Unzueta (bitxigintza eta zeramika uztartzen ditu Jone ZZ proiektuan).
Izena emateko galdetegi hau bete edo mezua bidali behar da habian@oarsoaldea.eus helbidera. Bertaratzeko ez da aurretiazko ezagutzarik behar.
