Oiartzungo Berdintasun Plana onartu dute, "udalaren jarduna eta herria eraldatzeko tresna"
Oiartzungo lehen plan feminista onartu zuten atzoko udalbatzarrean, aho batez. Genero ikuspegia udaleko sail guztietan txertatuko dute, eta politika feministak martxan jartzeko hainbat egitasmo ere jaso dituzte plan honetan.
Adostasuna izan zen nagusi atzoko udalbatzarrean, EH Bilduk eta EAJ taldeek aho batez onartu baitzituzten puntu guztiak. Lehenik eta behin, Oiartzungo Berdintasun Plana (Oiartzungo I. Plan Feminista) onartu zuten, 2024 urtera arteko iraupena izango duena. Gobernuko kideek planak duen “izaera transbertsala” nabarmendu zuten, izan ere, genero ikuspegia udaleko sail guztietan txertatuko dute, “pixkanaka proiektu guztietan lan egiteko modua eraldatuz”. Horrez gain, eragile ezberdinekin eta mugimendu feministarekin elkarlanean egindako politika feministak martxan jartzeko hainbat egitasmo ere jaso dituzte plan honetan.
Olga Leibar feminismo zinegotziak hartu zuen hitza atzoko bilkuran, eta nabarmendu nahi izan zuenez, “berdintasuna lortzeko bidean pausu garrantzitsuak eman ditu oran arte udalak”. Berdintasun saila sortzea eta indartzea eta herriko diagnostikoa nabarmendu zituen, besteak beste. !Lehenengo plan feminista hau aurrerapauso garrantzitsua da, izan ere plana estrategikoa da, egungo egoera jasotzen du, helburuak finkatzen ditu eta etorkizun hurbilean landu beharrezkoak zehazten ditu, bide-orri sendo bat eskainiaz udalari barne zein kanpo lanetarako. Udalaren jarduna eta herria eraldatzeko tresna izango da”, erantsi zuen.
Bestetik, ‘Geuretik sortuak’ kultur egitasmorako ekarpena handitzea ere erabaki zuten atzoko saioan. Hasierako ekarpenari 2.730 euro gehitzea erabaki zuten.
Ibargain musika eskolak ere diru gehiago jasoko du, hala erabaki zuten atzoko udalbatzarrean, “eskolak eskaintzen duen zerbitzua herri onurarako dela ikusirik”. Hala, 4 urtetik 8 urte bitarteko lehen aldiz izena eman duten ikasleen laguntza osoa izango da (doakoa), eta mantenu gastuetarako 15.000 euro emango dizkiote, ikasturte bakoitzeko.
Azkenik, aurtengo jaiak antolatzeko diru laguntzen banaketa adostu zuten, orotara, 50.000 euroko diru laguntza onartu zuten. 23 eskaera jaso dituzte aurten.
