'Zubiak Eraikiz', herriko ikastetxeetan aniztasunaren balioa lantzen
Pandemiak ikasleen arteko hartu-emana eragotzi arren, aurten ere askotariko ekimenak egin dituzte. Laburpen-bideoa ikusgai dago jada.
Lino plazan Idoia Beratarbideren diseinuarekin egindako murala. Ikasturtez ikasturte, Zubiak Eraikiz ekimenak proiektu ugari jorratzen ditu herriko ikastetxe zein eskualdeko Berritzegunearekin elkarlanean. Guztiek aintzat hartzen dituzte herri hezitzailearen baloreak eta erdigunean izaten dute ikasleen arteko elkarguneak sortzea. Aurten, proiektuak herriko Haur eta Lehen Hezkuntzako 6 ikastetxeetan aniztasunaren balioa zentzu zabalean lantzea izan du helburu. Orotara, 1.500 ikaslek hartu dute parte, eta, pandemiaren kudeaketak sorturiko oztopoak gorabehera, ekimen ugari egin dituzte.
Mindararen eskutik gizarte inklusioan hezteko programa bat garatu dute, ikasleek aniztasun funtzionala duten pertsonen errealitatea ezagut dezaten. Bestalde, Katxiporreta Elkartearen Amaren Intxaurrak ikuskizunari esker, heriotzaren gaia jorratu dute. Azkenik, Idoia Beratarbide margolariaren gidaritzapean emakumeak artearen bidez bistaratzeko aukera izan dute. Azken lan horren emaitza Lino plazako horma-irudian islatu da.
Laburpen-bideoa jarraian ikusgai:
