Aurki zabalduko dute Xanistebanetan hesien zaintzan lan egiteko poltsa
Datorren astelehenetik apuntatu daitezke 18 urtetik gorako oiartzuarrak. Zozketa publikoa hilaren 26an izango da, udaletxeko pleno areto nagusian.
Xanistebanetarako hilabete eskas falta den honetan, udalak martxan jarri du hesien zaintzan lan egiteko poltsa. Hilaren 11tik (astelehena da) 22ra bitarte (ostirala) izena eman daitekeela jakinarazi berri dute, udaletxeko harreran.
Hiru baldintza bete beharko dituzte interesa dutenek, honakoak: 18 ute beteta izatea, oiartzuarra izatea eta euskarazko B2 maila edo baliokidea egiaztatzea. Batxilergo edo goi-mailako lanbide heziketa ikasketak euskaraz egin dituztenek B2 egiaztagiria eskatu dezakete jaurlaritzan; ziurtagirik ez dutenek euskara froga egiteko aukera izango dute.
Zozketa egingo dute apuntatutako guztien artean. Hilaren 26an (asteartea da) egingo dute zozketa publiko hori, 16:00etan, udaletxeko pleno areto nagusian. Izena eman duten guztiek bertan egon beharko dutela aurreratu du udalak.
