[Erreportajea] Papinen sorturikoa antxotarrei bueltatzeko
Antxok gune berri bat izango du datozen sanferminetan, Ibaiondoko zabalgunean: Papineko Gazteriaren txosna. 150etik gora gaztek bat egin dute, jaiekin lortutako dirua urtean zehar inbertitzeko.
Kaleko zabor bilketa, bazkaria eta jolasak egin zituzten larunbatean Papin Egunean. [Argazkia: Eli del Pozo]. 
Pandemiak utzi du ezer onik Antxon. «Ezin genuen ezer egin, ez non elkartu, eta Papinera [Molinao aldean dagoen parajea] joaten hasi ginen hainbat gazte», egin du atzera begirakoa Peru Montalvok (Antxo, 2004). Hura da sortu berri den Papineko Gazteria herri mugimenduaren kideetako bat.
Papinera zergatik galdetuta, «bizilagunak ez molestatzeko eta lasai elkartzeko» joaten zirela azaldu du Eider Garcia (Antxo, 1994) taldekideak. Bertan gauak eman eta hurrengo egunean garbiketa brigadak antolatzen zituzten guneko zaborra garbitzeko.
Ekain Iribarren (Antxo, 1995) da herri mugimenduaren beste partaideetako bat. Hark argi du Papineko gazteen hastapenak azken Inauterietan eman zirela. «Ezer» antolatu ez izanak mugiarazi zuen haren kuadrilla. «Esan genuen: ‘Gazte piloa ginen atzo, parrandarako gogoarekin, eta ez genuen ezer herrian’».
Hortik aurrera, kuadrilla bati eta besteari dei egin, eta zenbait bilera informal egiten hasi ziren, gazteen gogoei forma emateko. «Lehen bileran mundu guztia elkartu zen», gogorarazi du gazteenak, «uste dut lau bat ordu eman genituela bertan azkenean, afaldu eta guzti».
100dik gora laguneko bilkurak egitea «kaotikoa» iritzita, WhatsApp talde orokor bat sortu eta bakoitzaren nahi edo gustuen arabera multzokatu ziren (marketina, gaua, logistika, ur jolasak, ekintza txikiak…). Horrela antolatu dute sanferminetarako egitaraua, eta baita 150etik gora lagun bildu zituen Papin Eguna ere.
Jaiekin ateratako dirua «urte osorako sostengu ekonomiko» izatea nahi dute, ohiko larunbat batean, kasu, kontzertu bat antolatu eta «herriari emandakoa bueltatzeko».
