"Herritarren beharrei erantzungo dieten proiektuak" partekatu dituzte udalak eta aldundiak
Etorkizuna Eraikiz kapsularen bidez 99 lezoarrek egindako proposamenak aztertu ditu gaur Markel Olano diputatuak Jesus Maria Martiarena alkatearekin. Aparkatzeko zonaldea handitzea eta espaloiak berritzea eskatu dute nagusiki herritarrek.
Joan den maiatzaren 25ean Etorkizuna Eraikiz kapsularen bidez 99 lezoarrek hainbat ekarpen egin zituzten. Prozesu horretan bildutako datu horiek aurkeztu dizkio gaur Markel Olano diputatuak Jesus Maria Martiarena alkateari, Gipuzkoako udalerrietatik egiten ari den bileren barruan. Herritarrek egindako ekarpenak “elkarrekin aztertzeko” asmoa zuen gaurko bilkurak eta horien artean honako bi eskaera nagusitu ziren: aparkatzeko zonaldea handitzea eta espaloien berrikuntza egitea.
Olanok, bileraren ondoren, nabarmendu du “lurralde aurreratua, solidarioa eta kohesionatua” dela Gipuzkoa, “pertsona guztiei enplegua, babesa eta etorkizuna eskaintzen diena”. Horretarako ezinbestekotzat jo ditu lankidetza-ildoak “estutzea” eta herritarren proposamenak eta iritziak jasotzeko “bideak indartzea”.
“Gipuzkoak, etorkizunean ere, pertsona guztiei babesa, lana eta etorkizuna eskainiko dien lurraldea izan nahi du. Buru-belarri ari gara lanean helburu hori lortzeko, eta, horretarako, ezinbestekoa da lankidetza. Alde batetik, horrek esan nahi du erakundeen arteko lankidetza- eta harreman-ildoak estutu behar direla, eta, bestetik, herritarren proposamenak eta iritziak jasotzeko bideak indartu behar direla”, erantsi du diputatuak.
Olanok erantsi du lezoarren ekarpenak kontua hartuko dituztela aurrekontu parte hartzaileen prozesuan. Lezoko alkateak ere “oso positiboki” baloratu du egitasmoa, “Lezoko herritarren kezkak eta eskaerak ezagutu ahal izan ditugulako”. Lezoarren ongizatearen alde lanean jarraitzeko konpromisoa adierazi du Martiarenak, “kezka handiena agertu duten atalei lehentasuna emanez”, esan du, aparkalekuei eta espaloiak hobetzeko lan horiei erreferentzia eginez.
