Herriko sortzaile bila dabil Hiru Binaka egitasmoa
Irailean bi saio antolatu ditu herriko kultur zale talde batek, "uda giroan ere kultur ekitaldien aniztasuna bultzatzeko eta herriko kultur eragile, sortzaile eta kultur zaleen arteko saretzea bultzatzeko" asmoz. Binaka lan egiteko prest dauden sortzaileak behar dituzte.
Datorren irailaren 9 eta 10ean Hiru Binaka izeneko egitasmoa egingo dute Oiartzunen, herriko kultur zale talde baten egitasmoz, udalaren laguntzarekin. Kulturabirusa egitasmoak azken bi urteetan “herriko kulturgintzan utzitako arrastoari segika” antolatu dutela azaldu du talde honek, bi helburu nagusirekin: “uda giroan ere kultur ekitaldien aniztasuna bultzatzeko eta herriko kultur eragileen, sortzaileen eta kultur zaleen arteko elkar ezagutza eta saretzea bultzatzeko”.
Egitasmorako herriko sortzaile bila dabiltza, bikoteka lan egiteko prest daudenak. 20 minutuko hiru pieza sortuko dituzte partaideek, ahal bada hainbat diziplina uztartuta. Izena ematen dutenen artean osatuko dituzte bikoteak, hortaz, kolaborazio berriak egiteko prestutasuna eskatu diete interesdunei. Helbide honetara idatzi beharko da, hilaren 15a (ostirala da) baino lehen.
Oiartzuarrak parte hartzera animatu dituzte: “zeuk erabaki zertan sentitzen zaren sortzaile!”.
