Zirkuaren mundua gertutik ezagutuko dute oiartzuarrek
Hegoak Erroak eta Eroak elkarteek tailerra eskainiko dute herrian. Akroyoga, oihal akrobatikoak, lurreko akrobaziak eta malabarrak egiteko aukera izango da.
Zirkuaren mundura gerturatzeko eta bertan ohikoak diren hainbat jarduera praktikatzeko aukera eskainiko diete oiartzuarrei Hegoak Erroak eta Eroak elkarteek etzi (larunbatean), tailer baten bitartez. Saio honek “zirku mundua zabaldu eta zirkuarekiko maitasuna partekatzea” du helburu antolatzaileen arabera, eta orotara, lau aukera eskainiko dituzte: akroyoga, oihal akrobatikoak, lurreko akrobaziak eta malabarrak. Parte hartzeko ez da beharrezkoa izango inolako esperientziarik izatea, eta doakoa izango dela aurreratu dute.
14 urtetik gorako pertsonek parte hartu ahalko dute, lotura honetan eman beharko dute izena, edo bestela, 661 10 52 52 telefono zenbakira deituz. Hiru zatitan banatuko dute larunbateko saioa: 10:30etik 12:00etara, 12:30etik 14:00etara eta 16:00etatik 17:30era.