[Elkarrizketa] «Betiko abentura horietatik aldendu nahi izan dut»
Beste sari bat poltsikoratu berri du oiartzuarrak: 2022ko Mikel Zarate haur literatur saria, ‘Marrubizko uda’ nobelagatik. 3.000 euro jasotzeaz gain, Elkar argitaletxeak saritutako lana kaleratuko du, liburu batean.
Nola jaso duzu saria, espero zenuen?
Sari guztiak beti jasotzen dira pozik, baina sorpresa puntu batekin jaso dut oraingo hau, adin horretako publikoarentzat idazten dudan lehen aldia izan baita. Oso pozik nago.
Gogoa zenuen haurrei begirako zerbait egiteko?
Bai, bereziki 6-12 adin tarteko publiko horrentzat ez dut inoiz lan handirik egin. Orain dela gutxi ipuintxo bat idatzi nuen Oiartzun Filosofikoa elkartearentzat, baina adin horretarako ez dut inoiz ezer idatzi. Agian txiki-txikientzat bai, helduentzat ere, baina tarte horretarako ez. Gogoa nuen probatzeko.
Nolakoa izan da sormen prozesua?
Normalean denbora gehiago pasatzen dut istorioa sortzen pentsatzeko prozesu horretan. Gero forma ematea errazagoa egiten zait. Nahiko azkar idazten dut. Egia esan, hau, ezer baino azkarrago idatzi dut. Nik uste dut helduen lanei buelta gehiago ematen dizkiedala. Baina lan hau oso modu naturalean idatzi dut, oso naturala izan da prozesua. Jarri eta idatzi, hala izan da. Lehiaketa honetarako espresuki idatzitako lana izan da. Bat-batean ideia hori etorri zitzaidan burura, eta idazten hasi nintzen.
Zer kontatzen duzu Marrubizko uda eleberri honetan?
Familia baten istorioa kontatzen dut, non arrazoi desberdinengatik oporraldia aldatu egiten zaie, eta orduan oporraldi berezi bat egiten dute. Lehen aldiz kanpin batera joaten dira oporrak pasatzera. Familia barruko harremanak islatu ditut, kanpinean dauden beste familia horiekin dituzten harremanak eta sortzen diren laguntasun horiek. Harremanetan oinarritu naiz bereziki, ez da abenturazko halako istorio bat.
Badu helburu edo gogoetarik lanak?
Gogoeta baino, helburu jakin bat du: entretenitzea eta ongi pasatzea, hori bilatu dut. Umorez eta ironiaz betetako istorioa da, eta barre batzuk egiteko eta une atsegin bat pasatzeko aukera ematen duela uste dut. Irakurterraza da, umoretsua, eta horrek laguntzen du.
Beraz, familia osoak gozatuko du.
Baietz esango nuke. Bereziki 10-12 urte bitarteko haur koxkorrei begirakoa da, baina helduentzat ere uste dut entretenigarria dela, familia baten ohiko harreman eta gertaeratxoak kontatzen ditudalako. Uste dut barre batzuk eragingo dituela gurasoen artean ere.
Elkar argitaletxeak argitaratuko du gainera. Badakizu noiz?
Ziur ez dakit noiz kaleratuko dugun, baina asmoa da udazkenean, dena ongi badoa, salgai jartzea. Elkarrek marrazkilari bat jarriko du eta hark ilustratuko du lana.
Zergatik animatu herritarrak argitalpen hau erosi edo irakurtzera?
Adin horretarako beste liburu bat izan daitekeela uste dut, agian ez daude horrelakoak irakurtzera ohituta. Betiko abentura horietatik aldendu nahi izan dut, bira bat eman.
Bestelako proiekturik buruan?
Oraintxe bertan ez. Nahiko egunez egun joaten naiz. Tartetxo bat dudanean idazten dut, lehiaketa baterako edo niretzako maiz. Momentuan idazten dut, inspirazioa datorkidanean.
