Barrakek prezio herrikoiak izango dituzte madalenetan
Haurren bidaiek 2,20 euroko prezioa izango dute, eta helduenek 2,80 euro. Gainera, uztailaren 23an eta 26an are merkeago izango dira: 1,30 euro.
Madalenetako barrakak. Argazkia: Herri Bizia Aurten ere, Errenteriako Udalak eta Euskadiko Ferialari Autonomoen Elkargoak hitzarmena sinatu dute Fanderiako feria eremuko baldintzak adosteko. Horien artean, atrakzio eta barraken prezioak adostu dituzte. Adostutakoaren arabera, haurren bidaiek 2,20 euroko prezioa izango dute, eta helduen bidaiek 2,80 euro. Horrez gain, uztailaren 23 goizean eta 26an prezioak are merkeagoak izango dira, bidaia bakoitzak 1,30 euroko prezioa izango baitu.
Hitzarmenak bestelako gai batzuk ere jorratzen ditu: ingurugiroa, genero ikuspegia, gai teknikoak eta soinuaren kontrola, esaterako. Era berean, euskararen presentzia indartzeko iniziatiba jarriko da martxan. Ferietako salerosleei eta salmenta ibiltaria egiten duten pertsonei hiztegitxoak banatuko zaizkie, oinarrizko hartu-emanak euskaraz egin ahal izateko.
Ludoteka eta dutxa zerbitzuak
Bestalde, ferietako salerosle eta salmenta ibiltaria egiten dutenen 4 urtetik gorako seme-alabentzat ludoteka zerbitzu eskainiko du udalak. Markola ludotekan izango da, uztailaren 22tik 25era, 17:00etatik 19:00etara.
Azkenik, dutxa zerbitzua ere izango da eurentzat, Galtzarabordako kiroldegian. 8:00etatik 11:00etara izango dute horretarako aukera, uztailaren 20tik 25era, baina uztailaren 22an kiroldegia itxita egongo denez, egun horretan Niessen Kulturgunea atonduko zaie.
