[Argazki galeriak] 1.090 egun geroago, hemen dira madalenak
Madalenetako azken eguna 2019ko uztailaren 25ekoa izan zen. Gaurtik berreskuratuko dituzte kaleak eta plazak errenteriarrek.
2019ko uztailaren 25ekoa izan zen Errenteria-Oreretako Madalen Jaien azken eguna. Jakinak diren arrazoiengatik, 2020an eta 2021ean ezin izan ziren ospatu festak. Gaur bai. Gaurtik eta hilaren 25eko 00:00ak arte, herriko plazak, kaleak, txokoak, elkarteak, tabernak berreskuratuko dituzte, jai giroan, errenteriarrek eta bisitariek. 101 ordu dira. Askorentzat txiki. Besteentzat asebetea hartzeko modukoak.
Jai Batzordeak, hau da, herriko eragileek, proposamen asko landu dituzte 2022ko madalenak, beharbada inoizko irrikarik handiena sortu dutenak, denen gozagarri izan daitezen. Haur, heldu edo adineko, denek izango dute uneren bat (edo asko) esateko ‘itxaronaldiak merezi izan du’. Hainbat arrazoirengatik hiru urte latz izan dira 2019tik 2022koak. Orain, norberak ezarritako tamainan eta beti ondokoarekiko errespetuz, bidean gelditutako besarkadak eta irribarre konplizeak konpartitzeko garaia iritsi da.
Haurren txupinazoa, Mila Koloretako Txupinazo Txikia, 18:00etan izango da Koldo Mitxelena plazan. 19:00etan, Gernika plazan, gazteei bideratutako Holi Festa izango da; 19:00etan ere bai, Herriko Plazako txupinazo nagusia (Arrats eta Ekintza BIBE elkarte omenduek botako dute), eta noski, EMKEren eskutik Zentenarioa. Emozioa bor-bor herrian gaur. Jaien hasierako ekitaldien aurretik, ordea, badira jarduerak. Beheko zerrendan ikus daitezke denak.
Egunez eguneko egitaraua HITZAren ‘Agenda’ atalean irakur dezakete hala nahi dutenek. Izan ere, hedabide honek madalenen jarraipen estua egingo du. Gaurko ekitaldien zerrenda ikusteko, sakatu hemen.
Nostalgikoenentzat, hemen egin ziren azken txupinazoetako irudiak ikusteko aukera, 2019ko uztailaren 21eko irudiak hain zuzen ere:
