PSE-EEk jaietan herritarrek eta eragileek izandako inplikazioa eskertu du
Era berean, udalari lotutako zenbait kexa adierazi ditu, eta eskatu dio jai "anitzagoak eta inklusiboagoak" antolatzeko lan egin dezala.
Errenteriako PSE-EEk pasa berri diren madalenen balorazioa egin du. Bertan, herriko eragile eta herritarrek izan duten inplikazio “aktiboa” eskertu du, “jaien funtsa izan direlako”. Euren esanetan, horrek ahalbidetu du 2022ko Madalen Jaiak pandemia aurreko berdinak izatea: “alaiak eta biziak”.
Dena den, udal gobernuari zenbait kritika zuzendu dizkio. Udalak jai “zabalagoak eta kalitate handiagokoak” antola zitzakeela uste dute, “gure festek merezi genuen moduan distira egin zezaten, eta kanpotik etorritakoek ere goza zitzaten”. Bizikidetzari lotutako iruzkina ere egin nahi izan dute. Isaac Palencia, sozialisten bozeramailea: “Faltan bota dugu udalaren inplikazio handiagoa egitarau anitzago eta inklusiboago bat antolatzeko”. Ildo beretik, jaietan izan diren zenbait gertakari salatu dituzte: “Aurten ere, ETAko presoen aldeko pintaketak, kartelak eta pankartak jasan behar izan ditugu”. Gainera, “onartezina” iruditu zaie Iñaki Pikabea Piti-k Madalen Aurreko Txistularien Kontzertuan izandako presentzia, baita “kontzertu horretan presoei egindako erreferentziak” ere. Alkatea egiten dute horren guztiaren erantzule, eta berehalako neurriak hartzeko “exijitu” diote, errepika ez daitezen.
Ekitaldi batzuetan izandako segurtasun arazoak ere aipatu dituzte euren balorazioan. Zehazki, uste dute udal gobernuak prozesioaren antolaketa eta beste zenbait ospakizun tradizional “boikotatzeko jarrera nabarmena” eduki duela. Azkenik, garbiketaren alorrean eta zaborraren kudeaketan ere gabeziak atzeman ditu talde sozialistak. “Uste dugu hainbeste esperotako jai hauek kudeaketa hobea merezi zutela”.
