«Argi nuen hasieratik jendeak izan behar zuela protagonista»
Instagrameko 'iraitz_paintings' kontuan jarrai daiteke sortzailearen lana. 2018an ere zure kartela hautatu zuten Xanisteban Jaiak iragartzeko, eta Kontzejupea irudikatu zenuen. Aurten, herritarrak.
Musukoa kendu zigutenean inspiratu nintzen. Oso emozionatua nengoen jendearen irribarreak ikusten eta Oiartzungo kartelaren lehiaketa egingo zela argitaratu zutenean esan nuen: ‘Jendea pozik agertu behar da eta kontaktu fisikoa egon behar du. Azken bi urteetan eduki ez duguna’. Argi nuen hasieratik jendeak izan behar zuela protagonista.
Hori kolorea da baita ere protagonista. Erabaki horren atzean zer dago?
Marrazkia aspaldi egin nuen, ideia etorri zitzaidanean. Ez nekiena zen hondoko kolorea zein izango zen, eta egon nintzen azken momentura arte itxoiten ea Oiartzungo jaietako bazkariko kamisetazein kolorekoa izango zen. Nahi nuen kartela kamisetaren kolore berdinekoa izatea, bai ala bai. Azkenean, laguntxo batek aurreratu zidan erabili dudan kolorekoa izango zela elastikoa, baina egia esan, azkenean ez dakit zein koloretakoa izango den kamiseta… Bestalde, mostaza kolore hori nire kolore bezala identifikatzen dut, nire parte txiki bat ere jarri dut horrela.
Herritarrez gain plazako iturria dago.
Hasiera batean jendea bakarrik irudikatu nuen, baina esan nuen: ‘Edozein herritako jaiak izan daitezke’. Orduan, Oiartzun identifikatzen zuen zerbait sartzea erabaki nuen. Udaletxea, adibidez, sartzeko handiegia iruditu zitzaidan, eta herria sinbolizatzen duten horietan pentsatuz iturria etorri zitzaidan burura. Errekonozitzeko erraza zen zerbait nahi nuen, eta hori sartu nuen hondorako.
Irabazi zenuenean nola jaso zenuen berria?
Sorpresa izan zen. Abuztuaren 1ean joan behar dut udaletxera saria jasotzera. Egun berezia izango da, izeba, ama eta osaba elkartuko gara.
