Antxoko eraso matxista arbuiatu du udalbatzak aho batez
Udaleko alderdiek bat egin dute eraso matxista "gogor gaitzesteko". Gipuzkoako Foru Aldundiak ere gertakaria "irmoki salatu" nahi izan du.
Iragan astean Pasai Antxoko Luzuriaga eremuan izandako indarkeria matxista kasuaren aurrean, adierazpen bateratua egin dute Pasaiako udalbatza osatzen duten alderdi guztiek (PSE-EE, EAJ, EH Bildu eta Ahal Dugu). “Eraso matxista gogor arbuiatu eta gaitzetsi nahi dugu”.
Hedabideei helarazitako oharrean, biktimari eta ingurukoei babesa, laguntzeko prestasuna eta gertutasuna agertu nahi izan dizkiete udal ordezkariek. Halaber, ziurtatu dute udalak eskura jarriko dizkiola biktimari beharrezkoak dituen informazio-iturriak eta gizarte arloko udal baliabideak, “errekuperazioaren eta erreparazioaren prozesuan lagun egitearren”.
Pasaiako bizilagunei dei egin die aginte organoak udalerrian gerta daitekeen edozein eraso matxistaren aurrean jarrera aktiboa har dezaten, horrelako gertakarien aurrean “zero tolerantzia” erakutsiz. Adierazpena, osorik, hemen sakatuta irakur daiteke.
Aldundia, bat eginda
Gipuzkoako Foru Aldundia ere gertakariaren aurka agertu da, eta ohar baten bidez udalaren hitzekin bat egin nahi izan du. Foru erakundeak “elkartasun osoa eta babesa” eskaini die erasoa pairatu duen emakumeari, nahiz haren gertuko lagun eta senitartekoei.
