Gazte Izanak elkarteak eta Oiartzungo Udalak antolaturiko bazkariak txiki utzi du Madalensoro. Bazkalostean, dantzarako tartea izango dute.
190 erretiratu inguru elkartu dira gaur bazkaltzeko. Madalensoro pilotalekua txiki utzi du gaur eguerdian erretiratuen bazkariak. Gazte Izanak elkarteak eta Oiartzungo Udalak elkarlanean antolaturiko jarduerak 190 lagun inguru bildu ditu frontoiaren barnealdean. Horiei guztiei jaten emateko catering bat kontratatu behar izan dute.
Gazte Izanak taldeko arduradunak pozik agertu dira bazkariak izan duen harrerarekin, baina aitortu dute azken edizioan (2019an) 40 bat lagun gehiago izan zirela, eta litekeena dela koronabirusak eragindako beldurrak utzi izana bizilagun asko etxean. “Izugarri eragin du birusak”, aitortu dute gaur eguerdian, “eta nabari da hori jendearengan”.
Hori horrela ere, jendetza elkartu da gaur bazkaltzeko. Eta ez janaria dastatzeko bakarrik! Izan ere, bazkalostean musikaz girotuko baitute pilotalekua, eta dantzan ospatu ahal izango dituzte gazte izandakoek Oiartzungo Xanistebanak.
Jarraian, gaurko zenbait argazki:
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
