Orotara, doako lau bisita gidatu eskainiko dituzte udan zehar Aiako Harria gune naturalean eta Lau Haizeta parkean.
Aitzbitarte haitzuloetara ere eskainiko dituzte bisita gidatuak. 
Errenteria-Oreretako Listorreta-Barrengoloia gunean abian jarriko da berriro giden zerbitzu ofiziala. Datorren asteburutik aurrera, Aiako Harria Parke Naturaleko ondare naturala eta kulturala ezagutu ahal izango dira espezialista baten eskutik.
Jarraian, proposaturiko hiru ibilbideen gaineko zenbait xehetasun:
- Añarbeko basoa. Eskainiko den ibilbideetako bat Añarbeko basoaren erreserba ezagutzeko lau orduko bisita gidatua da. Idoian (Susperregi) abiatuko da txangoa eta inguruko bistez gozatzeaz gain, Malbazargo eta Pagosardeko hezeguneetan bizi den faunaren berezitasunak ezagutu ahalko dituzte bisitariek.
- Aizpitarteko kobazuloak. Aukeretako beste bat Aizpitarteko kobazuloetako aztarna paleolitikoak ezagutzeko irteera izango da. Euskal Herrian aurkitutako Goi Paleolito garaiko lehendabiziko aztarnategi horretan hainbat fosil topatu dira, eta, era berean, kobazuloetan bizitako antzinako ehiztariek egindako lantzak eta harrizko aizkorak ere agertu dira.
- Lau Haizeta parkea. Beste bisita bati esker Lau Haizeta parkea eta bertako monumentu megalitikoak ezagutu ahal izango dira. 600 hektareako babestutako eremu horretan gure arbasoek eraikitako hainbat monumenturen arrastoak ikusi ahalko dira: trikuharriak eta tumuluak. Aldi berean, San Markoko eta Txoritokietako gotorleku militarren inguruan dauden basoetan eta hezeguneetan ere barneratuko dira bisitariak.
- Aiako Harria. Azkenik, Aldura, Pertxel eta Igantzi mendietako bazterrak zeharkatuko dituen bisita gidatua egiteko aukera eskainiko da. Idoiatik (Susperregi) abiatuta, Aiako Harriko Parkearen barneko hiru mendi horien inguruneak eskaintzen dituen bista panoramikoez gozatu ahal izango da. Añarbeko urtegiko bistez gozatu eta beste zenbait gune ezagutu ahalko dira.
Bisita gidatuak urrira arte egingo dituzte, eta doakoak izango dira. Guztiak 10:00etan abiatuko dira, baina egutegi eta abiapuntu desberdinak izango dituzte, aukeratutako bisitaren arabera. Horiei buruzko informazioa eskuratzeko, edota aurretiko erreserba egiteko, hiru bide proposatu dituzte: Errenteriako Turismo Bulegoa (Madalen Kalea, 3), 943 49 45 21 telefono zenbakia, edota posta elektronikoa.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.
