Talde hasiberriei taularatzeko aukera emango die Piztu Lezok
Irailaren 16an lur hartuko duen Banden I. Topaketaren bitartez, hasiberri diren musikariak ezagutarazi eta euskal musika sustatu nahi dute.
Irailaren 16an, ostiralarekin, Lezoko Banden I. Topaketa antolatu du Piztu Lezok, udalaren finantziazioari esker. Egitasmoak talde hasiberriak ezagutzera emateko helburua du, euskarazko musika sustatzearekin batera.
Zabalik dago izena emateko epea, hilaren 18ra arte, eta parte hartzeko baldintza bakarra jarri du talde antolatzaileak: euskarazko abestiak taularatzea. Lezoko taldeez gain, eskualde nahiz Euskal Herri osoko talde hasiberriei zabalik da oholtzara igotzeko aukera.
Parte hartu nahi duten musikariek Piztu Lezoren webguneko galdetegia bete beharko dute datorren astea bukatu baino lehen. Hori eginda, antolatzaileak izango dira musika taldeen hautaketa egingo dutenak, eta hil honetan zehar jakinaraziko dituzte izen horiek.
Argi utzi dute banden topaketa ez dela “lehia hutsa” izango, baina saria izango du hoberen baloratutakoak: 2023ko Lezoko mendekosteetako kontzertuetako talde nagusia izatea.
Lezo “Euskal Herriko musikazaleen bilgune” bihurtu nahi dute, eta horregatik, euskal musikariak gonbidatu dituzte banden topaketan izena ematera, eta ikusleak, noski, talde hasiberriak babesteko Lezora hurbiltzera.