Urdinek bigarren egin dute Europako proba garrantzitsuenetako batean
Sella Ibaiaren Nazioarteko Jaitsieran merituzko bigarren postua erdietsi du Pasaia Kayakeko Eukene Saez eta Iñaki Fernandezek osaturiko K-2ak.
Saez eta Fernandez podiumean, pozarren, zilarrezko domina kolkoan, Escuela de Piraguismo Aranjuez taldeko ordezkariekin batera. 
Azken larunbatean jokatu zen, Asturiasen, Europa osoan garrantzitsuenetakoa den piraguismoko probetako bat, Sella Ibaiaren Nazioarteko Jaitsiera, eta bertan parte hartu zuen Pasaia Kayakek K-2 misto seniorren mailan, eta arrakasta handiz, gainera. Eukene Saez eta Iñaki Fernandez izan ziren ordezkariak.
Bikote pasaitarrak buruan ekin zion 20 kilometroko jaitsierari, eta aurretik zituzten ontzien olatuak aprobetxatuz, erritmo onari eutsi ahal izan zioten, baina bosgarren kilometroan sartzean atzetik zetorren Aranjuez taldeko K-2ak harrapatu eta azkenean uberatik atera zituen, burua hartuz.
Urdinek ez zuten amore eman eta lanean gogor jarraitu zuten bigarren postuari eusteko. Hamabosgarren kilometrora iristean, Aranjuez talde indartsuko bigarren ontzia gainera etorri zitzaien pasaitarrei, baina arazo tekniko txiki bat izan zutela baliatuz, Saez eta Fernandezek bigarren egin zuten azkenean, irabazleengandik 2 minutu eta 49 segundora.
Bikote arrakastatsuak maratoi modalitateko Espainiako Txapeleketa prestatuko du orain, itsas probetan aritzen diren taldekideek Donostia-Pasaia-Donostia proba klasikoa prestatzen duten bitartean, Donostiako Aste Nagusiaren barruan, hilaren 20an. Marea urdinak ez du etenik.
