LAB Sindikatua: "ez dira istripuz hil, ez dira zorte txarrez hil"
Gaur eguerdian egin dute elkarretaratzea gehiengo sindikalak deituta. Azken egunetako lan istripu eta hilketak salatu eta "egoera sostengaezinarekin" amaitzeko aldaketak eskatu dituzte.
Gaur goizeko elkarretaratzean 'lan istripu gehiagorik ez!' lelopean bildu dira. Gehiengo sindikalak deituta, eguerdiko 12:00etan bildu dira, herriko plazan, azken egunetan gertatu diren lan istripu eta hilketak salatzeko. Atzoko egunez gertaturiko bi ezbeharrekin (horietako bat Errenteria-Oreretan bertan jazotakoa), 49 dira, honezkero, urte honetan Hego Euskal Herrian hil diren langileak.
Istripu eta heriotzak lan prekarietatearen, segurtasun faltaren eta gehiegizko lan kargen ondorioa direla salatu du Ane Alberdi Legorburuk, ELA Sindikatuko kideak. Haren ustez, patronalak du erantzukizuna, “azpikontratazioa lan prekarietatea da, eta produkzioa areagotu nahiean langileak segurtasunik gabe ari dira lanean”. Gainera, oso eroso dagoela azpimarratu du “administrazioaren babes osoa dauka”.
Bestalde, Aitor Sagastik, LAB Sindikatuko kideak, elkartasuna adierazi nahi izan die hildakoen senide zein gertukoei. Egoera “sostengaezina” da sindikatuarentzat. Eta gertakarien aurrean, Urkullu eta Mendia seinalatu ditu zuzeneko erantzule bezala, izan ere, zenbait erabaki politikok langileak “hiltzera kondenatzen” dituztela azaldu du: “ez dira istripuz hil, ez dira zorte txarrez hil”. Hori dela-eta, lehendakariari eta lehendakari ordeari, patronalari begira jarri beharrean langileei begira jartzeko eskatu die. “Lanera joan eta bizirik bueltatzen garela” bermatzeko eskatuz.
ELAk bere aldetik, egoera salatu eta egoeraren kronifikazioaren, bai eta prekarietatearen aurrean ere, lanean jarraituko dutela azaldu du Alberdik.
