Asteburu zirraragarria, Oarsoaldeko traineruentzat
Zarautz, Bilbo eta Santoñara (Kantabria) hurbilduko dira eskualdeko bost traineruak; helburu ezberdinekin, baina lanez lepo.
Hibaikako neskak, Errenteriako Bandera irabazi ostean. Argazkia: Hibaika Arraun Elkartea. ETE Liga
Lehia itzela dago Hibaika eta Hondarribiren artean, Oarso-Bidasoko bi traineruak lehenengo eta bigarren baitaude, lau puntuko tartean. Oreretarrek azken bi estropadetan Hondarribiak izan duen nagusitasuna hautsi eta banderak etxera eraman nahiko dituzte. Horretarako, bihar Zarautzera mugitu beharko dute. Ez da itsaso barerik espero, metrotik gorako olatuak tarteko. Igandean Bilbora gerturatuko dira.
Hauek dira asteburu honetako hitzorduak:
- Bihar, larunbata: Zarautz Arraun Elkartearen Emakumeen II. Ikurriña, goizeko 10:30etatik aurrera.
- Etzi, igandea: Ane Aizpururen omenezko II. Oroimen Estropada, Bilbon eguerdiko 12:00etatik aurrera.
KAE1 Liga
Sanpedrotarra sasoi betean dabil, sailkapen orokorrean lehenengo postuan da, baina adi ibili behar du traineruak. Izan ere, iragan asteburuko banderetan bigarren (Castron) eta laugarren (Plentzia) sailkatu zen. Horregatik, adi ibili beharko dute, lau saio besterik ez baitituzte aurretik. San Juanen zeregina, ordea, azken asteetako gorabeherak uxatu eta aurretik dituen hiru traineruen pare uneoro egotea izango da.
Hauek dira asteburu honetako hitzorduak:
- Bihar, larunbata: Zarautz Arraun Elkartearen XIII. Ikurriña, goizeko 11:30etatik aurrera.
- Etzi, Igandea: Bilboko XLIX. Ikurriña, eguerdiko 12:00etatik aurrera.
KAE2 Liga
Bihar Santoñara (Kantabria) mugituko dira Hibaika eta Trintxerpe-Illunbeko gizonak, denboraldiko azken aurreko bandera lehiatzera. Hibaika hirugarren baldin badago ere sailkapen orokorrean, gogor egin beharko dute arraun. Izan ere, bi puntura du Mutriku (laugarren), eta hirura Portugalete (bosgarren); bestela, Donostiarrak (bigarren) zazpi puntu ateratzen dizkio. Trintxerpe-Illunbe azkenekoa da sailkapenean, eta aurrekoetatik ahal bezain gertuen egotea izango da helburua.
Hau da asteburu honetako hitzordua:
- Bihar, larunbata: Santoñako (Kantabria) LII. Bandera, Fernando Palacio “Cho”-ren omenez. Arratsaldeko 18:00etan.
