Pasaia Kayak, lehen taldea Donostia-Pasaia-Donostian
Helduen lasterketan, bigarren eta hirugarren postuak lortu zituzten pasaitarrek. Gazteek ere emaitza txukunak lortu zituzten.
Ioar Alonso eta Maialen Vitoria, sari-banaketan. Argazkia: Pasaia Kayak. Joan den larunbatean, Pasaia Kayakeko arraunlariek Donostia-Pasaia-Donostia itsas zeharkaldian parte-hartu zuten, Euskal Koparako froga puntuagarria zena. Hamar kilometroko ibilbidean zehar, Lander Rodriguez eta Aranetar anaiek Oier Aizpurua zumaiarrari aurre egiten ahalegindu ziren. Rodriguezek erasoa jo zuen ziabogara iritsi baino lehen, baina Monpasera iritsi aurretik zumaiarrak harrapatu eta gainditu zuen. Helmugan, bigarren izan zen Rodriguez, 45 minutu eta 32 segundoko denborarekin. Aizpuruak zortzi segundo gutxiago behar izan zituen, eta Aritz Araneta izan zen hirugarren, 46 minutu eta 09 segundoko denborarekin.
Gazteen zeharkaldian, lanak txukun egin zituen juniorretan Iker Lizasok, baita Ioar Alonso eta Maialen Vitoria kadeteek ere. Emaitzon ondorioz, taldekako sailkapenean lehenengo izan zen Pasaia Kayak, eta urdinek puntuen aldea murriztu dute Itxa-Gain talde zumaiarrarekiko. Euskal Kopako azken froga irailaren 25ean lehiatuko dute, Elantxobe eta Lekeitio artean.
