Etxez etxeko zerbitzuko langileek hiru hilabete bete dituzte borrokan
Maiatzean hasi zuten "lan eta bizi baldintzak hobetzeko borroka". Egoera aldatu arte grebari tinko eusteko asmoa dutela jakinarazi du ELA sindikatuak.
Pasaiako etxez etxeko laguntza zerbitzuko langileek hiru hilabete bete dituzte jada greba mugagabean, haien “lan eta bizi baldintzak hobetzeko borroka” hasi zuten maiatzean. ELA sindikatuak ohar bat kaleratu berri du, hainbat kontu argitu eta salatzeko.
Lehenik eta behin, zerbitzu honen titulartasuna udalarena dela gogoratu dute, eta EULEN enpresak kudeatzen duela. Zerbitzu hau emakumeek ematen dutela nabarmendu dute, “funtsezkoa” dela, “gure adinekoen ongizate fisiko eta emozionalaz arduratzen” baitirela gogoratu dute.
Pasaiako plantillak Gipuzkoako sektoreko lan baldintza okerrenak dituela gogoratu du ELAk, eta sindikatuak esan du ezin duela hori ontzat eman. “10 urte egon gara inolako soldata igoerarik gabe. Borroka honekin, langileok lan baldintza onak lortzeko antolatu eta ahaldundu gara. Lan baldintza hobeekin soilik hobetu ahal izango dugu, gainera, gure adinekoei ematen diegun zerbitzuaren kalitatea”.
Pandemia garaian haien lana funtsezko jardueratzat jo zutela diote, baina hala eta guztiz ere, “haien osasuna eta senideena lantzen eta arriskuan jartzen jarraitzen duten bitartean”, berriro ere “ikusezin” sentitu dira langileak administrazioaren eta enpresaren aurrean.
Kontziente dira grebak eragin negatiboa duela adinekoen zerbitzuan eta eguneroko beharretan, eta egoera hori noiz arte jasan beharko duten galdetu du sindikatuak. Udalak eta enpresak akordioa sinatzeko eta gatazka bukatzeko edukiak bermatu ez izana salatu dute beste behin.
2022tik 2024ra bitarteko urteetarako proposamen ekonomiko bat jaso dute langileek, baina salatu dute ez dagoela bermatuta KPIaren igoera, “berrikusi eta hobetu beharreko beste gai batzuez gain. Esanguratsua da KPIa erreferentziatzat hartuta igoera bermatuta dagoela Gipuzkoan duela gutxi sinatu diren Eraikuntzako edo Papereko hitzarmen pribatu eta maskulinizatuetan, eta eremu publiko eta feminizatu honetan, aldiz, ez”. Egoera horiek martxoaren 8an besteak beste gogor salatutako genero arrakala hori areagotzen dutela erantsi dute. “Askotan badirudi genero arrakala egun horretan bakarrik dagoela”.
Zaintza negozio iturri bat dela erantsi dute, “zergadunen diruarekin, langileei eta erabiltzaileei ematen zaien zerbitzuaren kontura”. Egoera aldatu arte borrokan jarraitzeko asmoa dute langileek, “etxez etxeko laguntza zerbitzuko langileok eta gure erabiltzaileek behar eta merezi dugun hitzarmena lortu arte”.
