Altamiran aparkatzeko txartelak berritzeko epea, zabalik
Azaroaren 30ean amaituko da eskabideak egiteko epea. Aurrez aurre zein telematikoki tramita daitezke, eta hiru urteko iraupena izango dute.
Abenduaren 31n Altamira auzoko Tomas Garbizu kalean aparkatzeko txartelak iraungiko dira. Hori dela eta, txartelak berritzeko epea ireki du udalak. Urtea hastearekin batera sartuko dira indarrean txartel berriak, eta hiru urteko balioa izango dute: 2023ko urtarrilaren 1etik 2025eko abenduaren 31ra. Txartela eskuratzeak 10 euroko kostua izango du. Eskaera egin ahal izateko baldintzak hiru dira: eskatzailea Lezon erroldatuta egotea, ibilgailuaren helbide fiskala Lezon egotea eta udaletxearekin zorrik ez izatea.
Eskaera egin nahi duen orok bi bide ditu horretarako:
- Aurrez aurre: udaleko Informazio Bulegoan, astelehenetik ostiralera 08:30etik 13:30era.
- Telematikoki: udalaren webgunearen bitartez, B@kq edo sinadura elektronikoa erabiliz. Kasu horretan 10 eurotako tasa aldez aurretik ordaindu beharko da transferentzia bidez, eta ordainagiria eskaeran atxiki.
Azaroaren 30ean amaituko da eskabideak egin ahal izateko epea.
