Karla Lekuona zelaiak itxura berria izango du aurki
Aldagelak eta eraikin osagarriak "zaharkituta" daudela dio udalak, horregatik jarri dute martxan proiektua, "futbol taldearen beharrei erantzuteko".
Goratz Gezala, Olaia Lasa eta Enekoitz Markos zinegotziek Karla Lekuona futbol zelaia bisitatu dute gaur, bertako instalakuntzak berritzeko joan den uztail bukaeran abiatutako lanak bisitatzen aritu dira. Aldagela eta eraikin osagarriak “zaharkituta” daudela azaldu dute, horregatik jarri dute martxan proiektua, “futbol taldearen beharrei erantzuteko”.
Eraikin nagusiak erabateko itxura aldaketa jasango du, guztiz berrituko baitute. Bertan sei aldagela berri eraikiko dituzte, horietako bat, egokituta. Aldagela horiek komun bana eta bederatzi dutxa izango dituzte, 7 egokituak.
Taldeen aldagelak handituko dituztenez, eraikin berri bat ere egingo dutela azaldu dute zinegotziek gaur, orain arte eraikin nagusian zeuden ekipamendu gelak kokatzeko hain zuzen. Epaileek ere bertan izango dute aldagela. Eraikin honek zelaira zuzenean joateko korridore bat izango du eta horretarako harmailak mugituko dituzte, egun harmailak dauden lekuan egingo baitute korridore hori.
Azkenik, eraikin osagarriko aldagelak berrituko dituzte, entrenatzaileek erabil ditzaten. Zelaia inguratzen duen hesia ere aldatuko da, “jokalarien segurtasuna hobetzeko” asmoz.
Denboraldi honetan 400 jokalari baino gehiagok jantziko dute Oiartzun KEren elastikoa. 21 talde ditu egun, emakumezko 8 eta gizonezko 13.
Lanak azaroan bukatzea aurreikusi du udalak. Lan hauetarako 382.854,84 euroko inbertsioa egingo dute.
